Парите навистина не можат да купат среќа, според најновото британско истражување
Најефективен начин за зголемување на среќата е подобрување на лекувањето на менталното здравје, е заклучокот од обемниот британски проект, истражување спроведено од Лорд Ричард Лејард – Lord Richard Layard од Лондонската школа за економија (ЛСЕ).
Добро ментално здравје и партнер – ги прави луѓето посреќни отколку двојно покачување на приходите, истакнува новото истражување.
Истражувањето вклучувало резултати од 200 илјади испитаници, коишто одговарале на кој начин различни фактори влијаат врз нивната добросостојба. Страдањето од депресија и вознемиреност, најмногу ги погодува индивидуите, додека љубовна врска најмногу придонесува за зголемување на среќата. Во Британија, лекувањето на депресијата и состојбите на вознемиреност, ја намалуваат мизеријата, односно чувството на несреќа, за 20 проценти, додека елиминирањето на сиромаштијата, би ја намалило мизеријата за пет проценти, се резултатите од студијата. Истражувањето било основано врз неколку меѓународни истражувања од целиот свет.
Тимот на истражувачи, истакнува дека нивната цел е го револуционизираат начинот на кој размислуваме за човекови приоритети и да се промовира нова наука на „субјективна добросостојба“ како мерка на успешно водење на една земја, наместо економијата како главен показател.
Ненси Хеј, директорка на Центарот за добросостојба What Works Centre for Wellbeing, ја нагласи важноста на студијата. „Поголемиот дел од луѓето сметаат дека подобрувањето на добросостојбата е важно и дека треба да се делува. Она што потешко се сфаќа е што сè можат да направат Владата. Бизнис секторот и заедниците“, вели таа. Инвестирањето во добросостојба е добра тактика за политичарите – е ставот на тимот. На европските избори, уште од 1970 година, задоволството од животот е најдобар показател дали таа влада би била повторно избрана – многу поважно од економскиот раст, невработеноста или инфлацијата.
„Во минатото, државата успешно се фокусираше на сиромаштијата, невработеноста, образованието и физичкото здравје. Но подеднакво се важни семејното насилство, алкохолизмот, депресијата и состојбите на вознемиреност, оттуѓената младина, окупираноста со тестови и многу други нешта. Сите овие треба да бидат во фокус“, заклучува проф. Лејард.
