Научниците создадоа уред што им помага на идните мајки самостојно да ја мониторираат својата бременост
Полските научници развиле преносен уред – пренослива верзија на фетален монитор за срце – што им овозможува на трудниците самостојно да го следат здравјето и состојбата на нивното бебе, започнувајќи од пулсот, рано откривање на абрупција на плацентата, хипоксија (недостаток на кислород во одредени делови од телото на бебето) кај бебето или детекција на замотување со папочната врвца. Направата се вика „Прегнабит“ – Pregnabit и е наменета за рано откривање на неправилностите поврзани со бременоста и можните закани за мајката и плодот.
„Раното откривање на заканите придонесува кон побрза реакција и спроведување на соодветни медицински постапки. Така, животот на бебето може да се спаси од на пример, вршење на царски рез“ – истакнува д-р Патриција Вижинска Соха – Patrycja Wizinska-Socha истражувач кој работел на изработката на „Прегнабит“. Според Полската новинска агенција новоразвиената опрема користи професионални сонди како кај традиционалната кардиографска технологија – CTG, но за разлика од тие апарати, „Прегнабит“ е многу помал и пренослив.
Сега идните мајки во секое време и каде и да посакаат ќе можат да извршат само-преглед на своето бебе и да бидат сигурни за нивната состојба.
Уредот за самомониторирање на трудниците може да биде наместен на стомакот на трудницата со помош на специјален појас. Прегледот трае околу 30 минути. Откако податоците се собрани, уредот ги испраќа кон медицинските теле-мониторинг центри каде што добро квалификуван персонал ги анализира резултатите.
Иноваторката на производот во изјава за Reuters, што може да ја проследите во видеото подолу, истакна дека идејата за овој уред се појавила откако нејзина пријателка родила мртво дете. Д-р Патриција вели дека стапката на морталитет кај децата може многу да се намали. „Јас цврсто верувам дека можеме значително да ја намалиме“ – додава таа.
„Прегнабит“ може да се смести во мало куферче и може да се користи и во движење.
Овој уред го мери и движењето на фетусот, како и контракциите на утерусот. „Жената може уредот да си го однесе дома и во секое време од денот или ноќта да направи запис на податоци и да го испрати, а нашиот персонал од лекари и акушери ќе им ги испрати резултатите, а во случај на опасност ќе им испратат насоки“ – вели биомедицинскиот инженер Ана Скотни – Anna Akotny.
Наскоро се планира и веб интерфејс за пациентите да можат да ја следат својата историја на бременоста. „Прегнабит“ сè уште е во тест фаза, но истражувачите велат дека првите 50 уреди наскоро ќе бидат достапни. Се очекува овој уред да влезе на пазарот во текот на годината и ќе биде првично наменет за лекарите, акушерите и медицинските школи за акушерство.
