Денес започнува кампањата „Виолетов Караван 2016“ низ неколку градови низ Македонија, како дел од меѓународната недела (од 23 до 29 мај) за подигнување на свеста за заболувањата на тироидната жлезда
Од денес, па во текот на целата недела, низ Македонија ќе биде спроведена националната кампања „Виолетов Караван 2016“, организирана од Здружението за борба против рак „БОРКА-за секој нов ден“ од Скопје. Кампањата има за цел да ја подигне свеста помеѓу граѓаните за заболувањата на тироидна жлезда. Оваа кампања се одржува во склоп на одбележувањето на Меѓународната недела за подигање на свеста за тироидната жлезда во период од 23 до 29 мај 2016 година.
Кампањата опфаќа бесплатни прегледи на тироидната жлезда во седум градови низ Македонија, каде што ќе бидат поставени мобилни ординации за преглед. Прегледите ќе ги извршуваат искусни лекари, специјалисти од Институтот за патофизиологија и нуклеарна медицина и ЈЗУ Клиниката за ендокринологија во Скопје. Бесплатни ехо прегледи на тироидна жлезда, ќе се извршуваат на плоштадите во следниве градови:
- Струга – 23 мај;
- Струмица – 24 мај;
- Велес – 25 мај;
- Тетово – 26 мај;
- Кичево – 27мај;
- Куманово – 28 мај;
- Скопје – 29 мај.
Мобилните ординации за преглед ќе бидат поставени во овие по 8 часа дневно, а прегледите ќе ги извршуваат двајца лекари. Предвидено е да се прегледаат до 100 лица дневно, кои што имаат заболувања на тироидната жлезда, како и лица кои немаат симптоми. Информираноста за ова заболување е клучна, бидејќи успешно се третира доколку се открие навремено. Дури и денес, и покрај сите популарни мерки и информираност, проблемите со тироидната жлезда можат да останат незабележани и погрешно дијагностицирани.
Тироидните заболувања зафаќаат повеќе од 300 милиони луѓе на светско ниво.
Штитната жлезда се состои од голем број фоликуларни клетки со ќесеста форма, исполнети со густа течност која содржи тироидни хормони. Овие хормони се богати со јод и дури 80 проценти од јод во нашиот организам се наоѓа токму во штитната жлезда. Хиперфункцијата на штитната жлезда доведува до појава на Базедова болест, додека хипофункцијата во раниот развиток доведува до појава на ментално и физичко заостанување – кретенизам.
Темата на овогодинешната Осма Меѓународна недела за подигање на свеста за тироидната жлезда е: „Тироидни заболувања кај децата“.
