Дознајте ги фитнес тајните на олимпијците и добијте спортско тело
Бидејќи периодов е во духот на Олимпијадата, постојано гледаме затегнати тела на спортисти. Сакале или не, кај некои потсвесно, кај некои свесно – во вид на одлука и решителност, се појавува желбата за затегнато тело и здрав спортски изглед. Иако е јасно дека мали се шансите да изгледате исто како нив, сепак може да се потрудите да го дадете својот максимум и да ја постигнете вашата идеална фигура, или барем онаа со која ќе сте задоволни. Ви презентираме неколку тајни на врвните спортисти, поврзани со нивниот начин на исхрана и фитнес навики.
Пред да се посветите на вежбање, треба да се информирате за неколку нешта. Најпрво, треба да знаете какво тело имате, за да знаете која физичка активност најмногу ви одговара. На некои повеќе им одговара спорт кој вклучува брзина, а на некои издржливост. Друго важно прашање пред да започнете, е да одредите која е вашата цел. На пример, доколку планирате да ослабете, најмногу треба да внимавате на храната во комбинација со кардио вежби.
Неколку тајни на врвните спортисти за затегнато тело
Правилна исхрана
Без оглед што не вежбате за Олимпијада, треба да внимавате да внесувате здрави производи. Тајната на олимпијците е појадок со сложени јаглехидрати и протеини, како и јадење на секои три часа. Тие пијат многу течности за време на напорните тренинзи и доколку и вие се одлучите интензивно да вежбате, тогаш, освен вода, ќе треба да внесувате и спортски пијалаци за надополнување на електролитите.
Многу сон
Професионалните спортисти вежбаат долго и интензивно и затоа им е потребен сон подолг од 8 часа. Спортувањето, односно посветувањето на физичка активност со цел да постигнете трансформација на телото, бара дисциплина. Тоа значи дека нема седење навечер пред компјутер а дење спиење. Долгите часови сон треба да започнат околу 23 часот за оптимална работа на метаболизмот како и хормонален баланс.
Ментална подготовка
Врвните спортисти секогаш имаат зацртана цел пред нив која се трудат да ја постигнат. Нов рекорд, златен медал, постигнување нов личен рекорд, подобрување на перформансите и слично. За да ја постигнат својата цел, тие се служат со медитација, читаат книги за инспирација и имаат психолози со кои постојано разговараат. И покрај тоа што нема потреба да бидете толку амбициозни, сепак мора да имате зацртана цел. Менталниот тренинг нека ви биде активност која ве исполнува и инспирира.
Вежбање наутро
Олимписките спортисти вежбаат наутро. Вежбањето на почетокот на денот има повеќе позитивни страни: нема кој да ве вознемирува, мали се шансите да прескокнете вежбање заради други обврски, а најважно од се, ќе ве наполни со енергија и ќе се чувствувате одлично во текот на целиот ден.
Правилно загревање и истегнување
Пред вежбање, загревањето треба да биде динамично. Започнете со 10-минутно лесно скокање со јаже, па потоа 15 минути динамично загревање кое ќе ја подобри флексибилноста, координацијата, ритамот и ќе превенира повреди. Исто така, задолжително истегнување по завршување на вежбите за да се намали болката во мускулите.
