Често наоѓаме изговор да го прескокнеме вежбањето и наместо тоа да изгледаме уште филм притоа уживајќи во брз оброк
Замислете го следново сценарио – станувате рано наутро, ја облекувате омилената спортска опрема и одите да истрчате на кејот или да извежбате во теретана пред да ви започне работниот ден. Секој би рекол дека ова сценарио е идеално за добро започнување на денот и оттука вежбањето е најчесто на сечија листа на секојдневни работи коишто треба да ги направи. А сепак, на крајот од денот многумина од нас успеваат да најдат ваков или онаков изговор да го прескокнат и наместо тоа да изгледаат уште филм притоа уживајќи во брз оброк. Како најлесно може да го промените вашето секојдневие и да го направите вежбањето долготрајна секојдневна навика?Будете се порано
Можеби не сте ранобудници, но станувањето порано наутро, барем еден час од вообичаеното време за станување, може да ви помогне да стекнете навика да вежбате секој ден. Повеќе истражувања покажуваат дека луѓето коишто стануваат порано и вежбаат наутро успеваат да се придржуваат до вежбањето како до нешто што е неопходно за започнување на нивниот ден.
Пронајдете ја идеалната активност
Многу е важно да го сакате она што го вежбате и да уживате во него. Без разлика дали станува збор за кардио-тренинзи, пилатес или јога, она што ќе ви помогне да останете решителни во вежбањето е љубовта кон одредената физичка активност. Оттука, обидете се да го најдете она во кое најмногу ќе уживате и потоа потрудете се да го направите ваше секојдневие.
Вежбајте со пријател
На многумина од нас им треба мотивација за да започнат со било каква физичка активност. Многу студии докажуваат дека вежбањето со партнер е многу поефективно отколку вежбањето сам. Доколку сте од оние коишто мразат сами да вежбаат во теретана или да трчаат на кеј, најдете пријател со интереси како вашите со којшто меѓусебно ќе се мотивирате во вежбањето.
Одредете различни цели
Вежбањето е многу полесно кога имате одредено некоја цел. Вообичаено таа цел е губењето на вишокот килограми, но тоа не мора да биде единствената. Оттука, не се фокусирајте на една единствена цел како подготовка на телото за летниот одмор, туку размислите на сите предности коишто ги носи вежбањето, вклучувајќи го и физичкото и психичкото здравје.
Направете промена на просторот во кој вежбате
Просторот во кој ја правите омилената активност често може да внесе монотонија во вежбањето. Без разлика дали трчате, вежбате пилатес, кросфит или јога, обидете се често да го менувате просторот во кој вежбате. Доколку сте од оние што сакаат чести промени и динамичност во секојдневието, пробајте да го менувате студиото за вежбање или релацијата за трчање почесто за вежбањето да ви биде секогаш интересен процес што постојано ќе ве мотивира.