Не ви се допаѓа идејата да вежбате во сала заедно со уште триесет други луѓе? Доколку тоа ви е вистинската пречка секогаш може да вежбате дома
Доколку не посетувате теретана или фитнес студио не значи дека не сте, или не можете да сте физички активни. Зимските денови се при крај, па доколку не сакате да се покривате со облека во периодот што следува, треба да размислите да направите мали позитивни промени во секојдневните навики и да започнете со вежбање дома. Текстот е пред сè наменет за почетници, но на секого му треба мотивација за да стане од удобниот кревет и да се активира.
Мали чекори
Ако вашиот најчест изговор е дека немате време, престанете да го користите, бидејќи доколку сакате, може да најдете време во текот на денот за фитнес активност. Воедно, постојаната активност е добар почеток. Наместо со автобус одете пеш, одете по скали наместо во лифт, наутро станете порано за да се истегнете. Колку и да ви изгледаат банално овие предлози, помагаат, бидејќи ако сте во движење, полесно ќе ви биде да започнете со физички вежби. Планот не треба да ви биде амбициозен на почетокот, започнете со мали чекори а тоа значи, најпрво одредете си време за себе во текот на денот. За физичка активност ќе ви треба околу половина час, а секој има барем толку време дневно.
- Започнете со 5 минути модерирани кардио вежби, како трчање во место или скокање со јаже;
- 5 минути динамично истегнување;
- 10 минути функционален тренинг како клекнувања, склекови, подигања;
- 10 минути фокусирани вежби за посебни делови на телото;
- 5 минути ладење и статично истегнување.
Најголемата препрека со која се соочувате вежбајќи сами дома, освен мотивацијата, е вежбањето без професионален надзор, што е најголемиот недостаток од вежбањето дома. Но денес има навистина многу начини да работите на овој проблем. На вашиот телефон ви се достапни многу фитнес апликации коишто ќе направат план за вас и ќе го бележат вашиот успех.
Вежбајте пред екран
Вежбањето дома скоро некогаш се поврзува со вежбањето пред екран. Фитнес видеата за домашна употреба, својата популарност ја стекнаа во почетокот на осумдесеттите години од 20 век, со најпознатите видеа на актерката Џејн Фонда. Понатаму трендовите се менуваа но фитнес модата всушност започна од Фонда. Во деведесеттите најпопуларни беа степерите, додека влезот во новиот милениум го означи вежбањето јога. Денес се најпопуларни вежбите со висок интензитет: кросфит, програмата P90X и многу други комбинации на функционален тренинг, тежински тренинг и кардио вежби. Денес, на видео каналот YouTube постои огромен избор за сите – од почетници до напредни вежбачи, можете да изберете од јога до бокс. Воедно можете да вежбате кога сакате, а потребна ви е само простирка и мали тегови.
Запишувајте што јадете
Храната е нешто што не може да се изостави доколку сакате да бидете поактивни. Правилниот начин на исхрана ќе ви ја даде потребната енергија. Не значи дека треба да броите калории и да останете во кујна окупирани со правење оброци. Најдобро е да водите дневник и да запишувате што јадете во текот на денот, за да научите што ви одговара, која храна ве дуе, која ве исполнува со енергија и слично. На вашиот телефон можете да пронајдете многу апликации коишто значително ќе ви помогнат да одржите рамнотежа и контрола врз вашата исхрана.
