zimata-doagja-kako-polesno-vitaminot-d_image
Споделете со пријателите!

Периодот кој што следи се одликува со помалку и пократки сончеви денови – што значи и помала концентрација на витаминот Д во нашето тело. Но откако ќе прочитате за големата важност на овој витамин за нашето тело, почесто ќе размислувате за тоа како да си обезбедите доволни количини од Д витамин
Познато е дека витаминот Д се синтетизира од страна на нашето тело со помош на сончевата светлина. Всушност потребно е директно изложување на кожата, на сончева светлина за да се овозможи трансформација на 7 – дехидрохолестерол (присутен во нашиот организам) во холекалциферол-витамин Д3. Понатаму неактивната форма на витамин Д – холекалциферол се трансформира во активната форма – калцитрол. Иако овој факт е познат, сепак ретко се зборува за улогата која ја има витаминот Д во нашиот организам, за неговата поврзаност со одредени болести и состојби и за тоа како да бидете сигурни дека синтетизирате доволно од овој витамин.

За што сè му е потребен витаминот Д на нашето тело?

  • За подобра апсорпцијата на калциумот;
  • Потребен е и за мускулни контракции (движење на мускулите);
  • Потребен им е на нервните патишта за ефикасен пренос на информациите од мозокот до сите клетки и ткива;
  • Овозможува правилна функција на имуниот систем;
  • Го намалува ризикот од појава на остеопороза;
  • Ја модулира работата на паратироидната жлезда;
  • Ја поддржува работата на имуниот систем.

Поврзаност на нивото на витамин Д во телото и појава на одредени болести

1. Сумарниот резултат на повеќе од 63 обзервациони студии (кои ја истражуваат поврзаноста на витамин Д и појава на одредени канцерогени заболувања) е дека нормалното ниво на витамин Д во крвта е поврзано со помала инциденца на појава на канцерогени состојби, што значи дека овој витамин делува протективно врз појавата на канцерогени заболувања.

2. Исто така постојат и студии кои го истражуваат и го докажуваат позитивното влијание на витамин Д суплементација кај случаи на депресија. Сепак постојат и малку студии кои го покажуваат спротивното – но големиот број на студии кои ја покажуваат позитивната корелација помеѓу суплементација – или нормални нивоа на витамин Д во крвта и ублажување на симптомите на депресија се добра основа за тврдењето дека овој витамин може да се користи во одредени случаи на депресија (но потребни се и натамошни истражувања кои во целост ќе ги објаснат и докажат сите ефекти на витамин Д во различни случаи на депресија).

Прочитајте:  L’Orèal најавува: сензор за мерење на изложеноста на УВ зраците

3. Витаминот Д е поврзан и со ефективност на имуниот систем. Постојат студии кои докажуваат зголемена автоимуна реактивност и зголемена подложност на инфекции кај лица кои имаат помали нивоа на витамин Д во своето тело.

4. Дефицитот на витамин Д е поврзан со појава на рахитис, остеомалакија и остеопороза.

Како да бидете сигурни дека синтетизирате доволно витамин Д?

„Нашата земја има доволно сончеви затоа доволно е престојување од околу 15-20 минути на сонце“

Нашата земја има доволно сончеви денови и не спаѓа во оние земји каде рутински се испитува ниво на витамин Д во крвта и каде рутински се земаат суплементи во одредени периоди, или пак храната се збогатува со витамин Д. Затоа, доволно е да престојувате на сонце околу 15-20 минути на ден, со тоа што ќе треба да изложувате што повеќе кожа – директно на сонце. Во летните периоди почитувајте ги препораките за безбеден престој на сонце, а во постудените денови изберете го најтоплиот период од денот. Одбегнувајте непотребна употреба на средства за заштита од сонце – бидејќи тие средства во голема мера ја намалуваат синтезата на витамин Д. Доколку условите се такви што вие немате можност за да поминувате доволно време на сонце – тогаш добро е да направите анализа за ниво на витамин Д во крв, и ако има потреба да примените соодветни суплементи. Храната не е добар извор на витамин Д, но сепак мали количини од овој витамин може да се најдат во: риба, јајца, печурки кои растеле на сонце. Здравото население кое поминува доволно време надвор на сонце не е изложено на ризик од појава на дефицит на витамин Д, но некои категории на лица кои имаат одредени болести или состојби треба да обрнат повеќе внимание на тоа дали му обезбедуваат на своето тело доволна количина од овој исклучително важен витамин.


Споделете со пријателите!