Луѓето кои присуствуваат на живи свирки и други настани со музика во живо, се посреќни и позадоволни – покажа едно ново научно истражување
Оние коишто често посетуваат концерти, не го прават тоа без причина, туку поради чувството на радост и еуфорија. Сега и науката го потврдува тоа. Според една неодамнешна научна студија, објавена во зборникот „Психологија на музиката“ (Psychology of Music), а спроведена од страна на професорите по психологија Дон Џозеф (Dawn Joseph) и Мелиса К. Вајнберг (Melissa K. Weinberg), се потврди дека живата музика позитивно се одразува на чувството на благосостојба кај луѓето.
Истражувачите од Deakin University во Австралија, спровеле анкета врз 1,000 испитаници и откриле дека оние кои присуствуваат на јавните музички настани, вклучувајќи и живи настапи во локалните кафулиња, клубови, концерти и фестивали, па дури и едноставното танцување во толпа, покажале повисоки нивоа на целокупно задоволство од животот.
Истражувачите се фокусирале на субјективните нивоа на добросостојба за да го утврдат нивото на среќа на испитаниците и тие откриле дека чувството на припадност, односно да се биде дел од заедница за време на живите музички настани, бил еден од најважните фактори. Студијата сугерира дека не е важно кој бенд свири, туку ангажманот и поврзаноста помеѓу музичарот и публиката е од суштинско значење за чувството на среќа.
Нагласувајќи ги меѓучовечките придобивки, истражувачите се надеваат дека ова може да го поттикне развојот на нови интервенции кои можат да помогнат во лекувањето на анксиозност и депресија.
Позитивните ефекти од живите свирки се исто така зголемени кога комуницираме со оние околу нас што уживањето во свирката го прави заедничко искуство. Радоста да се види омилениот бенд е зајакната кога е потврдена од страна на оние со сличен начин на размислување. Иако слушањето музика е речиси неизбежен дел од секојдневието, посетувањето на живи концерти е нешто повеќе од само пасивно слушање. Со оглед на важноста на социјалната поврзаност со субјективната благосостојба, може да се очекува дека придобивките од музиката врз личната добросостојба се ограничени кон оние кои ја користат музиката како средство за социјално олеснување.
