Сите жени се грижат да не се здебелат, вели едно истражување
Дури и самоуверените жени, коишто немаат вишок килограми, се загрижени за својот физички изглед, открива едно истражување. Резултатите покажале дека жените кои имале нормална перцепција на физичкиот изглед врз основа на психолошки тестови, сепак се загрижени да не се здебелат според снимките на мозокот.
„И покрај тоа што тврдат дека не се окупираат со физичкиот изглед, нивните мозоци покажуваат дека ги вознемирува помислата од дебелина“, вели неврологот Марк Ален, истражувач од универзитетот „Бригам Јанг“ во Јута. Истражувачите објаснуваат дека мозочната активност е слична како кај жените коишто патат од нарушувања во исхраната, како анорексија, иако не е толку силна. Исто така, овие резултати се производ на притисокот од општеството врз жените коишто сметаат дека треба да се слаби, а не како последица од биолошки разлики меѓу половите.
Од 2013 година, дебелината е прогласена за болест од страна на Американска медицинска асоцијација (АМА). По дефиниција, дебелината е „медицинска состојба во која прекумерните телесни масти се акумулираат до степен што предизвикува несакано влијание врз здравјето, што доведува до намален просечен животен век и/или повеќе здравствени проблеми“. Се проценува дека дебелината е последица од многу фактори како: наследни, физиолошки, патофизиолошки, психолошки, културни, социјални, итн. Според препораките на Светската здравствена организација (СЗО), телесната тежина треба да се пресметува со помош на индексот на телесна маса BMI. Овој калкулатор го претставува односот на телесната тежина во килограми со висината на телото изразена во метри квадратни.
Бидејќи постојано се зборува за дебелината, се зборува и за губење на тежината. Оттука, слабеењето е голем бизнис и бидејќи најчесто не е успешно на долг период, има голем број на „клиенти“ коишто постојано се обидуваат да ослабнат.
Опседнатоста со дебелината и слабеењето оди дотаму што, една понова австралиска студија, од август 2016 година, покажа дека жените се повеќе загрижени од дебелеење отколку да им биде дијагностициран рак. Физичкиот изглед е на прво место на здравствени прашања кај жените, откри обемната студија, водена од здравствената организација Jean Hailes. Освен дебелината, во првите пет грижи за здравјето кај жените се менталното здравје, менопауза и хроничната болка.
Репродуктивното здравје не е на врвот на здравствени теми коишто ги загрижуваат жените, а е од исклучителна важност, нагласуваат лекарите. Друго изненадувачко сознание од ова истражување е дека жените во 20-тите и 30-тите години од животот најмалку се занимаваат со редовна физичка активност, односно вежбање.
