Повремена појава на зелена столица кај бебиња на ексклузивно доење кои напредуваат во тежина не треба да ве загрижува
Столицата својата боја ја добива од жолчната течност која се испушта во дванаесетпалечното црево. Поминувајќи го својот пат по должината на гастроинтестиналниот тракт, подлежи на трансформација и крајниот ефект е кафеава боја. Столицата која што ќе го заврши ова патување и притоа има зелена или жолта боја, типично е показател дека ова патување траело пократко од вообичаено.
Повремена појава на зелена столица кај бебиња коишто се на ексклузивно доење и притоа добро напредуваат во тежина, не треба да ве загрижува.
Доколку вашето бебе секогаш има зелена столица, а слабо напредува, тоа може да е показател дека бебето не добива доволно млеко богато со масти карактеристично за крајот на подојот. Мајчиното млеко на почетокот од подојот содржи повеќе лактоза (шеќер кој се ферментира во цревата и предизвикува грчеви, гасови, надуеност и зелени столици со кисела миризба). Тоа млеко содржи помалку калории (масти), брзо се вари и бебето е гладно за пократок временски интервал. „Воденото млеко” при крајот од доењето преминува во млеко богато со повеќе масти. Овој проблем се јавува најчесто кога мајката прерано го поместува новороденото на другата дојка.
При секој подој важно е да го оставите бебето да ја испразни дојката пред да го поместите на другата страна.
Други чести причини за зелени столици
- Чувствителност на бебето кон одредена храна која ја јаде мајката. Доколку столиците се зелени, слузави со примеси на крв, осип на телото, егзема и ред други симптоми, препораката би била мајката да ги елиминира млечните производи од својата исхрана. Подобрување може да се очекува по 2 до 4 недели (колку што е потребно да се елиминираат млечните протеини од кравјото млеко од телото на мајката и бебето);
- Лекови земени од страна на мајката (антибиотици, железо и др);
- Големи количини на зелена храна (зеленчук или храна со зелена боја);
- Присуство на вирусна инфекција. Зелена столица може да е единствен симптом кој може да е показател за присуство на вирусна инфекција и трае само неколку дена.
- Почеток на ротавирусна инфекција пропратена со висока температура, повраќање, водени столици со непријатна миризба и зелена боја.
- Жолтица на новороденото често пати води до појава на зеленкасто жолти столици кои траат сè додека не се исфрли билирубинот од нивното тело.
- Никнување заби е една од причините која води до појава на зелени столици кај некои бебиња заради тоа што во овој период се лачи повеќе плунка која бебињата ја проголтуваат, која пак ги иритира цревата и води до нарушена апсорпција.
- Адаптирано млеко збогатено со железо – доколку новороденото добива ваков тип на адаптирана формула може да се случи да има зелена столица.
Во поголем дел од случаите, зелените столици не се причина за грижа, доколку вашето бебе добро напредува на тежина. Здравиот изглед и нормалното напредување, треба да е појдовна точка при носење на одлука дека бебето добива доволно мајчино млеко што ќе резултира со ексклузивно доење, кое што е најдобар избор што може да го направи мајката.
