Заврши најголемиот интерактивен настан за здрав животен стил HFW Expo

Викендов Скопје беше во знакот на Health, Fitness & Wellness Expo

Изминатиов викенд на Македонија ѝ се случуваше најголемиот саем за здрав животен стил Health, Fitness & Wellness Expo во организација на „Моментум Инк“, a PharmaNews.mk беше таму како медиумски партнер. Идејата за ваков настан кој по втор пат се одржува кај нас, е иницирана од потребата за информации собрани на едно место од доменот на здравиот начин на живот. Целта е да се промовираат здрави навики, како и претставување на најновите трендови во здравата исхрана, фитнесот и сè она што претставува здрав животен стил.

На настанот, кој привлече голем број на посетители, изложуваа над 60 изложувачи кои што понудија богата и квалитетна програма исполнета со многу промоции, тренинзи, дегустации и бројни интерактивни активности. Имаше за секого по нешто, а за најмалите беше организиран Kids Corner конципиран како различни едукативни работилници. Беа организирани и најразлични натпреварувања за присутната публика, со вредни награди за најдобрите.

Настани кои што привлекоа најголем интерес беа шоуто на слеклајнерот Карлос Гарсија, заедно со изненадувањето на саемот слеклајнерот од Естонија, Таури Вахасар кои што ги воодушевија сите присутни, како и настапот на Специјалната Олимпијада на Македонија.

Големо изненадување во неделата, беа Панчо и Андреј ДНК, кои имаа свој настап во име на здравите навики и кампањата „Виталност, Хармонија, Енергија“ на Здравје+.

Саемот се затвори со наградување на учесниците кои што се истакнаа со најдобро саемско претставување. Извлекувањето го направија водителот Марко Новевски, организаторката Огнена Ристовска и Никола Василевски, маркетинг менаџерот на PharmaNEWS.mk кој ја додели втората награда. Бидејќи сите изложувачи се претставија впечатливо, трката за награди беше многу тесна, па се одлучуваше помеѓу шесте најблиски изложувачи: Првата награда ја добија „Славеј“ (котизација за наредната година HFW Expo) од „Моментум Инк“, втората награда им припадна на „Спорт Инн“ (пакет за рекламирање – „Здравје на стероиди“ од PharmaNews.mk), а третата награда им припадна на компанијата PharmaS (20% попуст за котизација и рекламирање). Се гледаме догодина а дотогаш за сите новини поврзани со здравиот начин на живот, информирајте се токму тука, на нашиот портал. 

Бидејќи една слика е илјада зборови, погледнете ги фотографиите во прилог и сами формирајте ја целата приказна наречена HFW Expo 2016: