Истражувачи од престижни универзитети излегоа со теза која го одобрува сарказмот како форма на комуникација бидејќи ја зголемува креативноста
Лингвистички објаснето, сарказмот е цинично исмејување, зборување спротивно од она што се мисли со зајадлив тон. Некои го користат сарказмот за да избегнат конфликти или физички пресметки со луѓе кои не им се омилени, за некои е забава, вид на ментална гимнастика, а некои за намерно да навредат. Некои дури го сметаат сарказмот како форма на вознемирување. Но, сарказмот често е и забавен начин да се излезе од напнати и незгодни ситуации, а истражувачи од неколку универзитети, меѓи кои и престижниот „Харвард“, открија легитимни когнитивни придобивки за луѓето кои што „зборуваат“ сарказам.
Оскар Вајлд има речено дека „сарказмот е највисока форма на интелигенција“, а истражувачи од универзитетите „Харвард“, „Колумбија“ и INSEAD, делумно се сложуваат со него. Оваа група, спроведе четири различни експерименти за да ги истражи можните придобивки од користењето на сарказмот во секојдневната комуникација. За првите три експерименти, учесниците биле поделени на неколку групи, во кои искажувале и „примале“ сарказам или искреност. Групите биле: изразување на сарказам, добивање сарказам, изразување искреност, добивање искреност или неутрален одговор кој не е ни искрен, ни саркастичен.
Четвртиот експеримент вклучувал слични групирања но со дополнителен елемент на доверба или недоверба во комуникацијата. Вака структурирани, испитаниците учествувале во неколку разговорни вежби во кои одговарале саркастично или искрено, во зависност од тоа во која група припаѓале. После завршување на вежбите, тие правеле бројни креативни тестови. Една од нив ги тестирала и вештините за апстрактно размислување.
Сите експерименти довеле до истиот заклучок, а тој е дека саркастичните коментари довеле до зголемена креативност и кај оние кои што се изразувале во овој тон и кај оние кои биле приматели на саркастични забелешки.
Со истражувањето кое го вклучило и апстрактно размислување, се пронашло дека давање или добивање саркастични коментари го поттикнува апстрактно размислување а тоа води кон креативност. Последниот експеримент пак, кој додаде доверба во комуникацијата, заклучи дека сарказмот во комуникацијата базирана на доверба, знае да биде продуктивен и конструктивен. Едноставно кажано, умерениот сарказам може да биде одлична ментална вежба за оние кои што сакаат да бидат покреативни.
