Нарушувањата во исхраната не бираат пол и возраст и секој е подеднакво склон кон заболување од анорексија, булимија или компулсивно прејадување
Многу досегашни истражувања сведочат за малата општа свест и препознавањето на индикациите кога станува збор за било какво нарушување во исхраната кај човекот. Општите верувања и неинформираноста се токму првите „виновници“ за понатамошното ширење на невистини и заблуди за нарушувањата во исхраната кај една личност. Особено кога станува збор за препознавање на првите знаци на нарушувања како анорексијата, булимијата и компулсивното прејадување, нивното влијание врз физичкото и психичкото здравје на човекот, како и за нивното лекување и пребродување.
Нарушувањата во исхраната се фаза која брзо поминува и не се сериозни
Нарушувањата во исхраната како што се анорексијата и булимијата во ниеден случај не можат да бидат животна фаза или период кој лесно се пребродува. Тие се сериозни здравствени проблеми што се производ на психолошки состојби од коишто страдаат и мажите и жените. Според истражување спроведено од организацијата „Анад“ – Anad, околу 30 милиони луѓе во САД страдаат од нарушувања во исхраната. Истото истражување сведочи дека овие нарушувања имаат највисока стапка на смртни случаи во светот.
Нарушувањата во исхраната се резултат на лошите односи во семејството
Во минатото честопати родителите се обвинувани и осудувани за нарушувањето во исхраната кај една личност. Оттука, многу нови студии и анализи се спроведени со целта да се истражат семејните односи на овие личности. Резултатите од истражувањата докажуваат дека кај околу 50-80 отсто од луѓето коишто се соочуваат со ваков тип на нарушување, се откриени генетски фактори коишто влијаеле. Имено, во сите случаи родителите одиграле есенцијална улога во подобрувањето на здравјето кај индивидуата.
Нарушувањата во исхраната може да се препознаат преку физичкиот изглед
Многумина сметаат дека болестите поврзани со исхраната кај човекот се препознатливи уште на првиот поглед. Точно е дека кај личностите коишто страдаат од анорексија многупати се забележува значително мала тежина, но ова не може да се однесува на сите нарушувања во исхраната. Досегашните статистики велат дека анорексијата се среќава кај 1 отсто, булимијата помеѓу 1-2 отсто, додека нарушувањето со компулсивно прејадување кај 5 отсто од светската популација. Булимијата и прејадувањето се нарушувања во исхраната коишто ретко се забележуваат преку физичкиот изглед на човекот. Имено, често луѓето коишто се соочуваат со едно од овие две нарушувања изгледаат здраво и, оттука, често е потребно многу време додека да се откријат симптомите.
Нарушувањата во исхраната се најчести кај женската популација
Општото верување е дека нарушувањата во исхраната се „женски проблеми“ и дека мажите не се соочуваат со булимија, анорексија или компулсивно прејадување. Вистината е дека речиси 10-15 отсто од луѓето коишто боледуваат од некакво нарушување во исхраната се мажи и момчиња. Во едно неодамнешно истражување спроведено од Американската академија за педијатри , е забележан огромен раст во нарушувања во исхраната кај мажите и момчињата во последните 10 години.
Нарушувањата во исхраната немаат врска со диетите
Многумина, особено адолесцентите, сметаат дека диетите не можат да влијаат на нарушувањата во исхраната. Напротив, диетите претставуваат огромен ризичен фактор дека индивидуата ќе развие некакво нарушување во исхраната. Особено кога станува збор за девојките во адолесценија коишто сметаат дека повраќањето и изгладнување се нормален начин за да се изгубат несаканите килограми. Неколку студии спроведени во Австралија и Нов Зеланд откриваат дека речиси половина од девојките во адолесценција се обидуваат да ослабат практикувајќи намерно изгладнување или повраќање. Токму овие случаи на млади девојки коишто не слабеат на здрав и умерен начин се трипати повеќе наклонети да страдаат од булимија, анорексија или компулсивно прејадување.
