Губењето на меморијата можеби е поврзано со вирусот херпес
Заборавањето генерално е прифатено како неминовен дел од процесот на стареење. Сепак, една научна студија откри дека староста не е причина за губењето на меморијата, туку можен причинител за оваа појава е вирусот херпес, стекнат уште за време на младоста.
Изложеноста на одредени врсти на вирусот херпес, може да влијае врз меморијата и когнитивната функција кај постарите луѓе и тоа години по инфекцијата, потврдува научната студија.
Овие сознанија се тесно поврзани со откритието за потенцијалните лекови против деменција по пат на специјален уред. Истражувањето од Факултетот за медицина во Пенсилванија од Универзитетот во Питсбург, беше спроведено врз илјада испитаници на возраст од 65 години. Испитаниците биле изложени на повеќе вируси, меѓу кои вирусите херпес симплекс HSV-2, цитомегаловирусот (CMV) и паразитот познат како Toxoplasma gondii. Студијата откри дека лицата кои биле изложени на дејството на вирусите било поверојатно да имаат опаѓање во функцијата на мозокот, во споредба со оние кои не биле инфицирани. Меѓу најчестите опаднати когнитивни функции била загубата на меморијата, како и збунетоста.
„Ние ги таргетиравме вирусите што нè инфицираат во разни временски периоди од животот, а потоа престојуваат во вашето тело засекогаш – тие не ве напуштаат. Нашето уверување е дека тие се оние кои се со поголема веројатност да предизвикаат штета“ – рече д-р Вишваџит Нимгаонкар (Vishwajit Nimgaonkar) лидерот на студијата.
Луѓето кои биле изложени на споменатите инфекции покажале поголемо опаѓање на когнитивните функции на мозокот, во споредба со оние кои не биле инфицирани.
При истражувањето, во предвид биле земени и други фактори како: образование, употребата на алкохол, висок крвен притисок и возраста. Сепак, сè уште не е откриено зошто и на кој начин овие вируси се поврзани со расеаноста. Образложението од страна на експертите е преоптоварувањето на имуниот систем во текот на долг временски период. Делови од имуниот систем имаат многу тесни врски со мозочните ткива, па оттука научниците сметаат дека преоптоварувањето на имунитетот може да биде причина за опаѓање на менталните способности.
„Ние не тврдиме дека овие инфекции се единственото нешто кое игра улога, ние само ги надградуваме доказите. Доколку успееме да докажеме дека овие паразити предизвикуваат когнитивно опаѓање, ова е потенцијален аргумент за развој на вакцини“ – објаснува д-р Нимгаонкар.
