Малите деца се изложени на висок ризик од ваков тип на повреди на мозокот бидејќи нивните мускули на вратот не се развиени за да можат да ја држат поголемата глава во однос на телото
Раздразливост, забавен развој, летаргија, повраќање, испакната фонтанела (меки точки на главата на бебето), проширени зеници, се дел од симптомите кои може да укажуваат на синдромот на „тресено бебе“ кое може да резултира со трајно оштетување на мозокот или смрт. Синдромот на „тресено бебе“ е форма на насилство која ги уништува мозочните клетки заради нарушена достава на кислород во мозокот и вклучува тријада од медицински наоди: субдурален хематом, крварење на ретината и оток на мозок.
Плачењето е начин на кој бебињата ги комуницираат своите потреби и чувства со надворешниот свет. Тоа е нивната комуникација со нас. Бебињата плачат кога се гладни, уморни, мокри, не им е удобно или кога се болни. Нормален плач на здраво бебе може да изнесува 2-3 часа вкупно. Понекогаш плачот може да значи дека има потреба од љубов и контакт со вас или едноставно сака да биде подигнато и држено в раце. Доколку плачот трае, а притоа сте ги задоволиле сите очигледни потреби на бебето колку и да ве фрустрира тоа, никогаш не го тресете бебето како мерка за смирување.
Синдромот на ,,тресено бебе“ се вбројува во форма на насилство и повреда на главата кај деца до 1 година (овој тип на повреда може да настане и кај деца до 5 годишна возраст), заради свесно или несвесно тресење на бебето со цел смирување .
Овој тип на повреда може да биде сторена од страна на дадилка, родителот или старател кој не е во состојба да го смири плачот на бебето или од страна на постаро братче или сестриче. Овој синдром се користи од стручната јавност за да се опише повреда на главата кај малите деца нанесена од тап удар , пад или тресење на главата, при што има тријада на симптоми.
Ретиналните краварења се јавуваат кај 85% од случаите и се многу корисни во поставување на дијагноза. Постојат многу други причини за појава на ретинални крварења но кај нив има низа дополнителни наоди кои ја прават алтернативната дијагноза очигледна.
Причини за настанување на повреди на мозокот кај бебиња
Кога бебето е нишано напред-назад или фрлано, неговата глава се ниша напред-назад и мозокот практично се удира од черепот при што може да дојде до раскинување на крвни садови и нерви кое води до крварење и оток.
Малите деца се изложени на висок ризик од ваков тип на повреди на мозокот бидејќи нивните мускули на вратот не се развиени за да можат да ја држат поголемата глава во однос на телото, а крвните садови во мозокот се со по нежна структура. Нормалната игра или потскокнување на колената од родителот или нежно отфрлање во воздух не водат кон овој тип на траума. Синдромот на тресено бебе настанува обично кога родител или старател или дадилка го тресе грубо бебето заради фрустрација или гнев најчесто заради плачот на бебето.
Фактори на ризик кои може да водат до појава на овој тип на повреда:
- Нереалните очекувања;
- Млади или еден родител;
- Стрес на родител или старател;
- Семејно насилство;
- Алкохол или злоупотреба на супстанции;
- Нестабилно семејство;
- Депресија;
- Историјата на малтретирање како дете.
Само неколку секунди на тресење на новороденото може да предизвика трајно оштетување на мозокот.
Бебињата кои го преживеале овој синдром најчесто имаат потреба од доживотна медицинска помош заради состојби како: Целосно или делумно слепило, губење на слух, ментална ретардација, епилептични напади, церебрална парализа.
Превенција
Кога плачот на вашето бебе не сопира, може да паднете во искушение да направите повеќе потези кои би го смириле, секогаш внимавајте тие да не се груби. Доколку имате проблем со справување со емоциите и стресот побарајте помош. Доколку имате потреба од некој друг кој би го чувал вашето дете, негователка, дадилка, баба дедо или било кој друг, бидете сигурни дека тие се запознати со оваа опасност.
