Што е тоа пернициозна анемија?

Општата дефиниција за терминот анемија е дека тоа е состојба во која бројот на црвени крвни клетки (еритроцити) е намален или пак постои некаков друг проблем со функционалноста на црвените крвни клетки- кој води до нивен намален капацитет за транспорт на кислород до сите клетки и ткива.

Пернициозната анемија се дефинира како состојба во која телото не може да создаде доволно здрави, нормално функционални црвени крвни клетки- поради тоа што има дефицит на витамин Б12- кој настанал поради лоша апсорпција на истиот витамин. Витамин Б12 (кобаламин) е хидросолубилен витамин чиј најсигурен извор е храната од животинско потекло. Овој витамин му е потребен на телото за тоа да може да синтетизира здрави и правилни црвени крвни клетки и за да ја одржува нормалната работа на нервниот систем. Лицата кои имаат пернициозна анемија не се во можност да апсорбираат доволно витамин Б12 од храната, поради тоа што ним им недостасува- еден протеин наречен интринсик фактор кој е неопходен за да настане гастроинтестинална апсорпција на кобаламин. И така недостатокот на овој протеин води до недостаток на кобаламин- што понатаму резултира со продукција на абнормални еритроцити. Секако дека постојат и други состојби и причини поради кои може да се дојде до недостаток на витамин Б12- но конкретно терминот- пернициозна анемија се однесува за анемијата која е резултат на дефицит на Б-12 кој настанал поради недоволна или отсутна синтеза на интринсик факторот.

Пернициозната анемија исто така може да биде предизвикана и од автоимуна состојба во која се продуцираат посебни антитела кои ги напаѓаат и уништуваат клетките во гастроинтестиналниот тракт-специјализирани за продукција на интринсик фактор, или пак во прашање се антитела кои се директно насочени кон интринсик факторот.

Пернициозната анемија е едно комплексно нарушување за чија дијагноза треба да бидат задоволени повеќе параметри т.е. да е присутна мегалобластна (макроцитна) анемија, да се присутни специфични антитела, и да има докажано нарушување на гастроинтестиналниот тракт. Оваа состојба, најчесто се јавува кај стари лица, но сепак околу 15% од лицата кои страдаат од пернициозна анемија се млади лица.

Третманите на автоимуните состојби сеуште се истражуваат, за некои автоимуни состојби и не постојат специфични третмани, и најважното од се – овие третмани не се многу успешни, па затоа вообичаено не е возможно да се реши проблемот со синтезата на интринсик факторот, поради тоа третманот на пернициозната анемија вообичаено е насочен кон регулирање на нивоата на витамин Б-12 во организмот. Обично не е доволен само зголемен диетен внес на кобаламин, бидејќи тој не може соодветно да се апсорбира, па така најдобри резултати дава редовно интрамускулно инјектирање на кобаламин (најдобро во форма на хидроксикобаламин) во соодветни дози, препорачани од специјалистот кој ја води анемијата. Ако се работи за помалку сериозна состојба, тогаш можно е третманот да се состои и во орален внес на суплементи на кобаламин, но сепак најбрзи и најдобри резултати особени кај посериозни случаи се постигнуваат само со интрамускулно инјектирање на кобаламин.

Постои забуна помеѓу дефицит на кобаламин предизвикан од други причини и пернициозната анемија, и иако третманот може да биде сличен (инјектирање или суплементи на кобаламин додека не се подобри состојабата) сепак станува збор за сосема различни состојби, па така пернициозната анемија не е само недостаток на витамин Б-12 туку еден поголем комплекс на нарушувања кои на крај водат до дефицит и симптоми на дефицит на кобаламин.