Се смета дека клаустофобијата се поврзува со дисфункција на делот од мозокот наречен амигдала којшто го контролира начинот на кој го процесираме стравот
Фобија претставува форма на анксиозно нарушување кое се манифестира со паничен и ирационален страв од одредени предмети или ситуации. Кај секој што страда од вознемиреност и беспокојност може да се развие фобија. Една од најчестите фобии е клаустофобијата, односно страв од затворени простори. Оној којшто страда од клаустофобија, најчесто има панични напади кога се наоѓа во затворени, тесни, збиени простори.
Причини за развивање на клаустофобија
Сè уште со сигурност не се знаат точните причини за развивањето на оваа фобија. Клаустофобијата вообичаено се развива уште во текот на детството или во тинејџерските години. Се смета дека оваа форма на психичко нарушување се поврзува со дисфункцијата на делот од мозокот, наречен амигдала, којшто го контролира начинот на кој го процесираме стравот. Клаустофобијата, исто така, може да се развие како последица од трауматичен настан како заглавување во лифт или во друг затворен простор подолго време, искусување на турбуленции при летање со авион и сл.
Симптоми на клаустофобија
Лицата што страдаат од клаустофобија во затворен простор најчесто ги покажуваат следните знаци:
- Во затворена соба или стан – постојано проверување на врати, стоење покрај врата или паничење кога сите врати се затворени;
- Во возило – страв од гужви во сообраќај и долго возење;
- Во зграда – страв од возење во лифт;
- На забава – стоење покрај врата, избегнување на голема маса луѓе;
- Знаци на паничен клаустофобичен напад;
- Потење;
- Чувство на голем страв и паника;
- Забрзан ритам на срцето;
- Хипервентилација или задишаност;
- Тресење;
- Вртоглавица;
- Мачнина;
- Несвестица;
- Болка во градите;
- Збунетост;
- Дезориентираност.
Лечење на клаустофобија
Третирањето на сите фобии, вклучувајќи ја и клаустофобијата се заснова на психолошки медицински методи, меѓу кои:
„Flooding“ – третман во кој личноста што страда од клаустофобија директно се изложува на одредени клаустофобични ситуации, сè додека не поминат неговите напади на паника и страв. Оваа форма на изложување на најголемиот страв досега во медицината се покажала како моќна терапија за лекување на клаустофобија.
„Counter-conditioning“ – третман што е добра алтернатива којашто може да помогне доколку личноста има голем страв од изложување на „Flooding“- терапијата. Станува збор за третман во кој пациентот учи специфични релаксирачки техники за справување со паничните напади.
„Modelling“ – третман во кој пациентот гледа како другите луѓе без страв се справуваат со оние работи коишто нему му создаваат страв и се охрабрува да ја стекне таа самодоверба.
Когнитивна терапија – третман во кој пациентот се охрабрува да се соочи со специфични мисли и ситуации што вообичаено поттикнуваат чувства на страв.
Медикаменти – седативи и антидепресиви исто така може да помогнат во лекувањето на клаустофобијата.
