Дали Интернетот е активирач за здравствена вознемиреност?
Кога некој чувствува болка или непријатност во некој дел од своето тело, обично прво ги проверува своите симптоми на Интернет, за да добие идеја за што може да станува збор. Понекогаш тоа пребарување може да му помогне да ги расчисти своите сомнежи, но малкумина знаат дека ова не треба да се зема како точно утврдена медицинска дијагноза. Во медицинските кругови се прифати терминот „сајберхондрија“ – опседнатост на луѓето да ги проверуваат своите симптоми на интернет во страв од болест или смрт. Интернетот е совршен за хипохондриците, бидејќи изобилува со информации. Исто така, постои можност за погрешно толкување или само делумно разбирање на медицинските информации. Пациентот може да биде презаситен од сложена медицинска терминологија и последователно може да стане позбунет. Понатаму, треба да се земе предвид дека дури и ако пациентот би можел целосно да ги разбере информациите, постои можност за мискомуникација во односот пациент-лекар. Пациентите може неразумно да го подигнат своето барање кај нивните доктори, предизвикувајќи напнатост во интеракциите. Лекарите може да го согледаат истражувањето на Интернет на пациентите како индикација за недоверба, особено ако пациентот се расправа со специјалистот и се обидува да му докаже. Ако пациентот одлучи да верува повеќе во она што го прочитал на Интернет наместо на она што го вели неговиот лекар, исходот може да биде штетен за третманот.
Желба на луѓето е да се уверат во информациите што постојано ги разгледуваат. Но, обично последиците се засилени со загриженост заради неточното толкување на медицинските податоци или нивната неспособност целосно да ги интегрираат.
Здравствената вознемиреност може да се дефинира како неоснована здравствена грижа за личното здравје, кога не постои болест, или прекумерна грижа, кога постои незначителен здравствен проблем.
Во минатото, требало да се посети лекар за да може да се добијат информации за своето здравје. Денес, можно е да се пристапи до огромна количина на информации со само неколку кликања. Сајберхондрија се однесува на вознемиреноста на една личност за своето здравје, што се создава или влошува со претераната употреба на Интернетот. Сепак, се верува дека сајберхондријата влијае на се повеќе луѓе, затоа што пристапот до Интернет е толку распространет. Многу луѓе кои имаат лошо здравје, не посетуваат лекар, туку веднаш се обраќаат на Интернетот да се само-дијагностицираат. Сајберхондриците обично се изложуваат до повисоки степени на стрес. Стресот, пак, може да предизвика покачување на крвниот притисок, појава на главоболки, зголемена напнатост на мускулите и ослабен имунолошки систем.
Главна карактеристика кај сајберхондрикот е прекумерното стравување од заболување или сериозно заболување, засновано на погрешно толкување на своите симптоми. Теоријата на когнитивно однесување посочува дека здравствената вознемиреност е резултат на погрешно толкување на информациите во врска со сопствените телесни сензации, во согласност со појавената загриженост за сериозна болест. Во ова нарушување, нормалните физички сензации и физиолошките појави на кои повеќето луѓе не обрнуваат многу внимание (како што е работа на срцето, надуеност, грчеви или прекумерно потење) се перцепираат и толкуваат како абнормални, заканувачки или опасни, предизвикувајќи интензивен страв. Физичките симптоми, нивната локација, квалитетот и времетраењето се опишани во одлични детали, но тие не одговараат на органска дисфункција и не можат да бидат поврзани со абнормални физички наоди. Симптомите обично се наоѓаат на еден или два органи, а многу поретко на повеќе органи или органски системи.
Сајберхондријата исто така може да доведе и до промени во меѓучовечките односи. Односите може да бидат негативно афектирани, бидејќи семејството и пријателите се уморни од слушање за постојаните здравствени проблеми на една личност. Исто така, ова може да и наштети на кариерата на една личност. Луѓето со оваа состојба се склони на финансиски последици, како резултат на недостатокот на работа, а честопати и заради барање скапи медицински тестови или купување скапи третмани на Интернет. Бидејќи некои од овие третмани може да бидат лажни, луѓето честопати трошат многу пари, за да го најдат оној со најголема точност. Доколку оваа состојба започнала во адолесценцијата, во подоцнежните години симптомите дополнително се интензивираат. За разлика од многу други болести, сајберхондријата подеднакво влијае на двата пола. Обично, текот е хроничен, со влошување на симптомите, но можно е и целосно закрепнување.
Како можете да ги ублажите овие симптоми?
Водењето начин на живот кој вклучува одморен сон, добра исхрана, вежбање, намалување на часовите поминати на Интернет, читање книги придонесуваат за подобро здравје. Можеби најважната стратегија за борба против сајберхондријата е да се избегне прекумерното барање информации на Интернет. Практикувајте дневни Интернет паузи. Кога барате информации на Интернет, неопходно е да се придржувате само до веродостојни извори што се поддржани од научни и медицински истражувања.
Ако загриженоста за специфичен симптом опстојува повеќе од неколку месеци, можеби е корисно да се добие мислење од професионалец. Лекарот може да обезбеди посигурни информации од пребарувањето на Интернет. Со професионална помош, луѓето ќе бидат во можност подобро да ги идентификуваат и истражуваат сите фактори кои придонесуваат за сајберхондрија и да научат како да се справуваат со нив.
Научете како правилно да го користите Интернетот.
Наоѓањето информации на Интернет поврзани со здравјето може да биде мошне корисно. Со правилна употреба, можете да научите повеќе за сопствениот здравствен статус, а тоа може да ве натера да бидете поодговорни и повнимателни во однос на вашата состојба, како што се практикување на соодветна диета, вежбање, односно здраво живеење. Друга предност на користењето на Интернет за здравствени проблеми е социјалната поддршка што може да се добие од другите со слични симптоми, особено во случаи на социјално неподносливи болести или проблеми за кои тешко може да се разговара во секојдневните ситуации. Понатаму, со учење повеќе за некоја болест, може подобро да се разбере претходното лекување, вие повеќе активно ќе можете да се вклучите, со тоа ќе си помогнете себеси а истовремено ќе им помогнете и на професионалците. Проширувањето на знаењето ја проширува перспективата на личноста и ја зголемува веројатноста за поголема одговорност. Интернетот може да послужи како алатка за психолошко зајакнување на пациентите.
