Симптоми на ектопична бременост
Причините и механизмите за појава на ектопична бременост, сè уште не се целосно дефинирани, но се смета дека имаат врска со нарушена функција на фалопиева туба, односно нарушен транспорт на оплодената јајце клетка и нарушено имплантирање.
Ризик фактори кои го зголемуваат процентот на ектопична бременост :
- Салпингитис инфекција на фалопиева туба (јајцевод) асоциран со претходни инфекции со хламидија. Тоа заболување води до појава на адхезии или сраснување, при што се нарушува подвижноста на ресничките кои се наоѓаат во јајцеводот. Заради ова нарушување, движењето на оплодената јајце клетка се забавува и потоа неправилно се имплантира.
- Претходни интервенции во областа на јајцеводите исто така може да доведе до појава на адхезии и деформитети.
- Историја за претходна вонматочна бременост.
- Користење на интраматочни средства за контрацепција. Овој тип на контрацепција е доста ефективна но ако тоа се случи (најчесто заради неправилно позиционирање), бременоста има голема шанса да е ектопична.
- Возраст на мајката над 35 години.
- Високо ниво на прогестерон и естроген води до зголемен ризик за настанување на ектопична бременост, се смета дека овие хормони го забавуваат движењето на оплодената јајце клетка.
- Вродени деформитети на фалопиева туба.
- Бременост која е остварена со ин витро метод.
- Ендометриоза.
- Тумори во карлица кои водат до промена на нормалната положба на јајцеводите.
При ектопична бременост, кога оплодената јајце клетка се имплантира во лигавицата на фалопиева туба, таа бременост се нарекува тубарна бременост. Бидејќи мускулатурата на тубата е многу тенка, таа лесно се нарушува што води до раскинување на артериите. Карактеристично е да се оформи хематом кој е причина да се одлепи оплоденото јајце (настанува тубарен абортус). Во матката истовремено настапуваат промени кои се набљудуваат при нормална бременост, но заради фактот дека во неа не се имплантирала оплодена јајце клетка, задебелената маточна лигавица се разрушува и настапува вагинално крварење. Тоа е најчест симптом при ектопична бременост.
Симптоми на ектопична бременост
Аменореја е симптом исто како и при нормална бременост. Често има оскудно крварење. Пациентките кои имаат ектопична бременост соопштуваат за коликообразни болки во долниот дел на стомакот. Ектопична бременост може да се одвива како тубарна руптура или тубарен абортус.
Многу често ектопична бременост се дијагностицира заради појава на хиповолемичен шок.
Причината е руптура на тубата каде се имплантирала оплодената јајце клетка. Оваа состојба има клиничка слика која се карактеризира со ненадејна силна болка, хипотонија, тахикардија, бледост и нарушена општа состојба. Кога има крв во стомакот може да дојде до перитонитис.
Симптоми кои го асоцираат неговото присуство се: перитонеално дразнење (гадење, повраќање и метеоризам) и мускулен дефанс. Болка во рамото е симптом кој се јавува кога има дразнење на нервот кој ја инерврира дијафрагмата (nervus phrenicus). Состојбата е опасна по животот на бремената и потребна е итна хирушка интервенција.
При тубарен абортус оплодената јајце клетка го сопира својот развој во тубата и се оддвојува од нејзината лигавица. Клиничката слика е атипична – болка со колика и крвав исцедок. За разлика од руптурата овој тип на абортус се одвива со подобар тек за пациентката и опасноста е помала.
Ектопична бременост во стомачната празнина се одвива со гадење, повраќање, болки во стомак, метеоризам, дијареа, констипација. Движењето на плодот е болно и плодот има деформитети.
Цервикална бременост е кога има имплантација на оплодена јајце клетка во цервикалниот канал.
