Протезите создадени на Универзитетот „Џон Хопкинс“ на жените со ампутирани нозе им враќаат дел од женственоста
Многу жени без еден или два екстремитети повторно продолжуваат да носат обувки на високи потпетици, но само кога седат во инвалидска количка, затоа што се плашат дека нема да можат да одржуваат баланс на своите поткренати протези. Исто така, повеќето од протезите на пазарот не се соодветни за екстремно високите штикли што многу жени ги сакаат. За среќа, животните околности повеќе не се пречка секој да може максимално да ужива во животот и да ја следи модата. Само 28% од жените никогаш не носат високи потпетици.
Група од пет студенти по инженерство од Универзитетот „Џон Хопкинс“, го открија решението на овие проблеми со кои секојдневно се соочуваат лицата со посебни потреби.
Иницијативата е поттикната од страна на женските американски војници, кои во војната во Авганистан во 2000 година ги загубиле своите екстремитети.
Токму затоа, студентите развиле протетско стапало со зглоб кај глуждот, што може да се прилагодува, за да може да се носат обувки со потпетица на различна висина.
„Жените со протези се ограничени во изборот на чевли што можат да ги носат. Ова им овозможува да носат скоро секаков тип на обувки што ќе одлучат“ – рече Џо Тилсон, еден од младите пронаоѓачи. Нивниот дизајн наречен Prominence (Воочливост) не е првата протеза на висока потпетица. Моменталниот избор на протези доста ограничува, а моделот на студентите е најнапредниот до сега. Ниту една од досегашните протези не може да поднесе чевел на потпетица повисока од 5 сантиметри. Студентите од Хопкинс го тестираа својот модел на пар екстремно високи потпетици од 14 см и тврдат дека нивните вештачки нозе имаат потенцијал да издржат дури и повисоки чевли.
„Ние само сакаме да им го подобриме квалитетот на животот на ветераните“, истакнува студентот Лук Браун.
Денес луѓето не се срамат толку многу од своите недостатоци, за разлика од порано. Иако досега има бројни подобрувања во протетиката, студентите од Хопкинс утврдија дека повеќето од протезите се создадени за машката популација, па опциите за жените се помали. Тие го создадоа овој модел, советувани од страна на Националниот воен медицински центар „Волтер Рид“ (Walter Reed National Military Medical Center), со цел да им се дадат повеќе опции пред сè на ветеранките.
Не заборавајте дека здравјето е поважно од меракот.
Зад стилскиот изглед лежи злобниот ризик што го загрозува целокупното здравје. Колку штиклите се повисоки и колку почесто се носат, толку тие се поопасни и сè повеќе научни истражувања укажуваат на овој факт. Високите потпетици се штетни за здравјето. Според статистиките на Институтот за здравје на `рбетот (Spine Health Institute), 72% од жените носат високи потпетици на редовна основа, 31% од жените носат штикли за на работа секој ден, 33% овие обувки ги носат за вечерни излегувања.
Телото на високи потпетици се обидува да се прилагоди на неприродната висина. Со цел да се одржи баланс, мускулите од потколениците, колковите и грбот стануваат напнати. Ова доведува до грчеви во мускулите и ризик од проширени вени, па и трајни деформитети во стапалата. Затоа избегнувајте да ги носите високите потпетици подолг временски период, истегнувајте ги мускулите пред и по носењето и купувајте штикли попладне, кога нозете се најшироки. Најважно е да се потрудите да се ограничите на 5 сантиметри висока потпетица, иако многу жени ќе речат дека тие неколку дополнителни сантиметри се многу важни.
