03-21-2020-dva-pati-prochitav-za-da-vidam-dali-sluchajno-pishuva-masturbiranje-ama-ne-pishuvashe
Споделете со пријателите!

„Два пати прочитав за да видам дали случајно пишува и мастурбирање ама не пишуваше“, беше реченицата со која ми се обрати во порака една моја пријателка како реакција на текстот „Having more sex makes early menopause less likely, research finds“, неодамна објавен во The Guardian
Студијата објавена во Royal Society Open Science 15 Јануари 2020 со наслов Sexual frequency is associated with age of natural menopause: results from the Study of Women’s Health Across the Nation, oткри дека жените во било која возраст доколку практикуваат сексуален однос еднаш неделно, имаат 28% помала веројатност да влезат во менопауза порано во споредба со жените кои имаат сексуален однос еднаш месечно.

Уште пред извесно време е забележано дека жените кои се во брак влегуваат покасно во менопауза во споредба со оние кои не се во брак иако причините за тоа се уште не се познати. Меган Арнот, докторант од Универзитетскиот Колеџ во Лондон и Рут Мејс која предава еволутивна антропологија на истиот универзитет, ја тестирале хипотезата во која се вели дека женскиот организам ја жртвува плодноста. Тоа е една особина за која е потребно вложување на енергија и ресурсите на телото – доколку личноста има малку сексуални односи тогаш шансите да затрудни се помали.

Тоа би можеле да го сфатиме како power saving mode: за да жената овулира и има менструален циклус, телото мора константно да произведува одредена количина на хормони, која се разликува во одреден дел од циклусот па мора ендометриумот на матката да биде подготвен а доколку не дојде до оплодување тогаш ендометриумот мора да се отфрли а со него се отфрла и крв па и железо кое за организмот е драгоцено. Зошто телото толку многу да се вложува доколку се шансите за репродукција и забременување се мали?

„Промени во расположението, осцилации во хормоните, топли бранови (валунзи) па и психичко оптеретување кога ќе се соочат со фактот дека ја губат репродуктивната способност, не се никако занемарливи и едноставни ефекти.“

Меѓутоа и самата менопауза е стресна за жените. Промени во расположението, осцилации во хормоните, топли бранови (валунзи) па и психичко оптеретување кога ќе се соочат со фактот дека ја губат репродуктивната способност, не се никако занемарливи и едноставни ефекти. Додека репродуктивниот потенцијал кај мажите останува во текот на целиот живот непроменет – продукцијата на сперма и сперматозоиди останува зачувана и во подоцнежна возраст без разлика што се јавуваат проблеми со либидото и потенцијата и постигнување на ерекција, жените се соочуваат со искуството менопауза. Ова е индивидуално искуство а во Masters-Johnson (петто издание) се наведува и констатацијата од трудот објавен во Journal of the American Geriatrics Society од 1981 со наслов „The adaptive function of the menopause: a devil’s advocate position“ дека „митологијата врзана за менопаузата е втемелена на не многу реални искуства од страна на жените туку повеќе на шовинистички интерпретации на женското искуство“.

Прочитајте:  Најважното правило за празничен детокс

Менопаузата се уште е некаков мистериозен период кој ги плаши жените во дел од светот и во принцип жените сакаат тој да се случи што е можно подоцна. За жал, тоа не зависи од нашата волја. Јасно е дека возраста на која настапува менопаузата е во голема мерка и генетски предодредена но овој труд од почетокот на овој текст го испитува и факторот околина.
Резултатите од трудот се темелат на податоците земени од 2936 жени кои се регрутирани за америчката студија во менопауза под име SWAN кохорт од 1990. Жените на почетокот во просек имале по 45 години и биле во брак или во врска. Биле замолени да одговорат на неколку прашања вклучително и прашањето дали имале сексуални односи последните 6 месеци и која е фреквенцијата на сексуалниот однос и дали имале некаков друг вид на сексуална активност како на пример орален секс или мастурбација. Најчест образец на сексуалната активност била еднаш неделно (64%).

Фактот дека жените кои имале сексуални односи почесто, влегуваат покасно во менопауза има корени во механизмот на влијанието на естрогените па и на другите полови хормони кои би можеле да започнат каскада на физиолошка реакција и да ја одржуваат плодноста кај жената ако организмот се наоѓа во ситуации кои можат да резултираат со бременост. Оваа претпоставка не е тестирана со овој труд бидејќи тој се темелат на прашалник а испитувањето на сигналниот пат кој доведува до оваа состојба би требало допрва да се испитува.

А што е со мастурбацијата? Авторките на трудот внимателно сугерираат дека ова исто како и оралниот секс, би требало да се зема во предвид. Ова се активности кои на телото му сигнализираат потенцијална бременост. 

Исто така, тука се истражувало дали машките феромони може да имаат некаква  улога во одлагање на климактериумот и одговорот е не, значи, не зависи од партнерот во хетеросексуалниот однос. Оваа променлива не можела да биде измерена директно но животот со маж е небитен фактор.
Всушност, заклучокот кој може да го извлечеме од ова е дека мастурбацијата е и те како пожелен и корисен акт.


Споделете со пријателите!