Појава на крв во урината

Инфекции на уринарниот тракт може да предизвикаат појава на крв во урината.

Состојбата којашто се манифестира со крв во урината којашто може да се види со голо око се нарекува макрохематурија, додека онаа кога крвта во урината е видлива само под микроскоп се нарекува микрохематурија. Иако во многу случаи оваа состојба е безопасна, таа може да укаже и на сериозни здравствени состојби.

Симптоми за крв во урина

Макрохематуријата, или видливата хематурија, се манифестира со менување на бојата на урината во розова, црвена или кафена како резултат на присуството на црвени крвни клетки. Крв во урината често се јавува без други знаци или симптоми.

Причини за присуство на крв во урина

При макро и микрохематурија, бубрезите или други делови на уринарниот тракт им овозможуваат на црвените крвни клетки да стигнат во урината. Различни проблеми можат да предизвикаат влегување на црвените крвни клетки во урината вклучувајќи:

• Инфекции на уринарниот тракт коишто се појавуваат кога бактеријата влегува во телото преку уретрата и се размножува во мочниот меур. Симптомите може да вклучуваат константна потреба за уринирање, болка и печење при уринирање и екстремно силна миризба на урината.
• Бубрежни инфекции коишто може да се појават кога бактериите влегуваат во бубрезите од крвотокот или се движат од уретрата кон бубрезите. Знаците и симптомите често се слични на инфекции на мочниот меур, иако поголема е веројатноста дека бубрежните инфекции ќе предизвикаат треска и болка.
• Камења во мочниот меур или бубрезите коишто настануваат кога минералите во урината формираат кристали на ѕидовите на бубрезите или мочниот меур. Камењата обично се безболни, па веројатно нема да знаете дека ги имате, освен ако не предизвикаат блокада. Тогаш тие може да предизвикаат силна болка како и видлива или микроскопска крв во урината.
• Зголемена простата којашто ја компресира уретрата, делумно блокирајќи го протокот на урина. Знаците и симптомите на зголемена простата (бенигна хиперплазија на простатата, или БХП) вклучуваат тешкотии при мокрење, итна или константна потреба за мокрење и видлива или микроскопска крв во урината.
• Рак на бубрезите, мочниот меур или рак на простата коишто честопати во раната фаза не се манифестираат со симптоми или знаци.
• Српеста клеточна анемија којашто е наследен дефект на хемоглобинот во црвените крвни клетки. Оваа состојба предизвикува крв во урината којашто може да биде микро и макрохематурија;
• Лекови како циклофосфамид и пеницилин. Видлива уринарна крв понекогаш се јавува и ако се земе антикоагулант, како што е аспиринот.
• Напорно вежбање коешто може да биде поврзано со траума на мочниот меур, дехидратација или распаѓање на црвените крвни клетки. Луѓето што често трчаат може да искусат појава на крв во урината, но и друг којшто практикува интензивни тренинзи.

Фактори на ризик

Речиси кај секој, вклучувајќи ги и децата и тинејџерите, може да се појави крв во урината. Сепак постојат фактори коишто може да го зголемат ризикот за појавата на микро и макрохематурија, а тие вклучуваат:

• Возраст – Многу мажи постари од 50 години имаат повремена хематурија поради зголемена простата;
• Инфекција – Воспалението на бубрезите по вирусна или бактериска инфекција (пост-инфективен гломерулонефритис) е една од водечките причини за видлива уринарна крв;
• Одредени лекови – Земањето аспирин, анти-воспалителни олеснувачи за болка и антибиотици како што е пеницилинот го зголемуваат ризикот за уринарно крварење.