Вкусни домашни крекери кои можете да ги јадете со кафе или чај
За подготовка на овие крекери потребно е малку напор и сила да се измеша тестото, а и да се исечат тенки, прави и рамномерни крекерчиња. Освен тоа, нема ништо комплицирано. Од оваа доза излегуваат многу парчиња, и траат долго време па ќе имате за со кафе, чај, сладолед или сирење.
- 2 шолји интегрално брашно;
- ½ лажиче сода бикарбона;
- ½ лажиче прашок за пециво;
- 1 кесичка ванилин шеќер;
- 1 шолја семки и јаткасти плодови (ореви, бадеми, лешници, семки од тиква, сончоглед, сусам, ленено семе…);
- 2 шолји суви овошја (урми, сливи, кајсии, грозје, брусници)
- 3 или 4 јајца
- 2 лажици мед
Помешајте ги сувите состојки, додајте ги јаткастите плодови, семките и сувото овошје, исецкано на парчиња со приближно иста големина, и промешајте со лажица. Додајте 3 јајца и медот и мешајте убаво. Тешко оди и треба да биде густо и суво, ама ако е премногу суво и има брашно кое останува и не може да се измеша, додајте го четвртото јајце.
Подгответе тавче со димензии отприлика 9 x 22 x 8 см, премачкајте го со путер и ставете хартија за печење на дното. ставете ја смесата во тавчето, израмнете ја површината и ставете ја да се пече во рерна загреана на 175°C околу 40 – 45 минути.
Кога колачот ќе биде готов, оставете го целосно да се олади, па ставете го во замрзнувач на 1 час, за полесно да се сече на тенки кришки. Исечете колку што можете потенки кришки и наредете ги во големо тавче врз хартија за печење, без да се преклопуваат, и печете ги во рерна загреана на 150°C, околу 10 минути. Внимавајте да не загорат.
* рецептите со во целост преземени од ситно сецкано
