Вообичаено одењето на прсти е привремено и се развива кај детето кога тоа се учи самостојно да оди
Одењето на прсти е состојба што може да се појави кај децата на рана возраст, односно кај оние коишто штотуку проодуваат. Одењето на прсти е нормално да се појави кога децата учат да одат, односно кога ја пренесуваат целата своја тежина на прстите, наместо рамномерно на целото стапало.
Кај многу деца оваа состојба не претставува проблем бидејќи со текот на растењето и нормалниот развој на нивниот од, тие ја пребродуваат.
Понекогаш децата продолжуваат да одат на прсти од навика и тоа не треба да ве загрижува бидејќи сè додека вашето дете се развива и расте нормално, одењето на прсти не би требало да предизвика посериозен проблем. Но, сепак, понекогаш се случува некои деца да продолжат да одат на прсти и по започнувањето со одење во градинка или забавиште што може да предизвика потешкотии со движењето.
Причини за манифестација на одењето на прсти кај децата
Вообичаено одењето на прсти е привремено и се развива кај детето кога тоа се учи самостојно да оди. Но во одредени случаи одењето на прсти може да биде резултат на посериозна здравствена состојба и да продолжи и по третата година. Одењето на прсти може да се развие како резултат на:
Кратка ахилова тетива
Ахиловата тетива ги поврзува долните мускули на нозете со задниот дел на петната коска. Доколку ахиловата тетива е кратка може да оневозможи петата нормално да ја допира земјата што предизвикува одење на прсти.
Церебрална парализа
Церебралната парализа е состојба што е предизвикана од оштетување на мозокот кое настанало пред, за време или по породувањето. Оваа здравствена состојба во зависност од нејзината сериозност може да предизвика одење на прсти и други посериозни проблеми со движењето.
Мускулна дистрофија
Мускулната дистрофија е генетско пореметување кое предизвикува мускулите на телото значително да ослабнат и да станат невообичаено осетливи на повреди. Ова пореметување на мускулите може да предизвика проблеми со движењето и неправилно одење на прсти.
Аутизам
Одењето на прсти досега многупати е поврзувано со аутизмот, пореметување што предизвикува проблеми во комуникацијата и интеракцијата на детето со луѓето околу него.
Кога е потребно да се посети лекар
Доколку забележите дека вашето дете продолжи да оди на прсти и откако ќе наполни две-три години, период кога неговиот од би требало да биде целосно развиен и неговото одење е придружено од грчење и затегнатост на мускулите, како и напнатост во зглобовите, пожелно е да се посоветувате со медицинско лице.
