Иако најчесто се безопасни, модринките кои не знаете од каде се појавиле можат да бидат и знак за нешто посериозно од едноставен удар
Кога ќе се појават модринки на кожата, прво на кое помислуваме е дека несвесно сме се удриле од некаков предмет и тоа е причината за модринката. Ваквите мистериозни модринки знаат да бидат навистина загрижувачки. Во најголем дел од случаите станува збор за некаков удар кој го предизвикал настанувањето на модринката, но понекогаш тие можат да бидат знак и за нешто посериозно.
Еве што сè може да предизвика модринки:
Недостаток на витамини
Витамините се многу важни за целокупниот организам. Како резултат на одреден недостаток на витамини во организмот, можат да се појават модринки по телото покрај другите симптоми. Недостаток на витаминот Б12, витаминот К и витаминот Ц може да доведе до појавување на модринките. Внесувањето на храна богата со витамини може да го надополни недостатокот од витамините и со тоа да се спречи појавата на модринки.
Стареење
Иако можеби ова звучи неуверливо, сепак стареењето може да биде причина за модринки. Кожата која старее е послаба и побледа, а промените кои настануваат во подлабокиот слој, како ослабувањето на крвните садови, може да предизвикаат модринки. Добрата исхрана и пиењето доволно количество на вода може да го оддолжи процесот на стареење и ослабување на кожата, а со тоа ќе се намали и појавата на модринки.
Болеста наречена Von Willebrand
Оваа болест исто така се смета како причина за модринки по кожата. Покрај модринките ова заболување знае да биде причина и за зголемено крварење за време на операција или за време на месечниот циклус, на пример. Оваа болест најчесто е наследна, и иако нема лек кој би ве излечил, болеста може да се држи успешно под контрола со лекови и терапии.
Кревање на тегови
Иако вежбањето се смета за добро за вашето здравје, претераното вежбање може да биде одговорно за необјаснетите модринки. Крвните садови можат да се скинат како резултат на преголем напор, а тоа е една од причините зошто ни тече крв од носот кога правиме нешто доста исцрпно. Интензивното кревање на тегови може да е претерано напорно за организмот. Тоа може да предизвика кинење на одредени крвни садови, што понатаму би предизвикало модринки по телото.
Дијабетес
Дијабетесот може да влијае врз циркулацијата, а тоа го олеснува појавувањето на модринки по телото. Зголеменото ниво на шеќер во крвта со текот на времето ги ослабува крвните садови и може да биде причина за појава на модринки. Освен модринките, преголемата жед, заморот, замаглениот вид и намалениот имунитет се сметаат за знак за дијабетес.
Болеста наречена тромбоцитопенија
Оваа болест означува намален број на тромбоцити кои учествуваат во процесот на згрутчување на крвта. Доколку постои недостаток на тромбоцити се зголемува можноста за постојана појава на модринки. Тромбоцитопенија често се појавува како последица на други состојби како проблеми со имунитетот, бременост или пак леукемија.
