Замислете вашето омилено чоколадо да го задржи својот неодолив вкус, а да содржи помалку шеќер
Свесни сме дека внесувањето на големо количество шеќер е лошо за нашето здравје, а сепак, не успеваме да одолееме на вкусните шеќерести кондиторски производи што се дел од нашето секојдневно мени. Постојат алтернативи како диететски пијалаци со аспартам и колачи со сукралоза и стевиа, но не секој е љубител на вештачки засладувачи. Во контекст на намалување на количеството на шеќер што луѓето секојдневно го внесуваат, швајцарскиот прехрамбен гигант „Нестле“ – Nestlé, најави промени во производството на своите производи што во голема мера се консумираат на глобално ниво.
Научниците од „Нестле“, како и во многу други прехрамбрени компании, бараат нови начини како да ги намалат количествата на шеќер и сол во своите производи.
Од „Нестле“ велат дека пронашле начин да ја променат хемиската структура на шеќерот што ќе овозможи нивните производи да содржат помалку шеќер, односно помалку калории, а истовремено да го задржат истиот сладок вкус. „Замислете вашето омилено чоколадо да го задржи својот неодолив вкус, а да содржи помалку шеќер. Ова наскоро би можело да се реализира, благодарение на истражувањата и напорната работа на нашите научници“, стои во официјалниот извештај од „Нестле“. Стефан Катсикас, технолог во „Нестле“, неодамна изјави за „Њујорк Тајмс“, дека со новата структура шеќерот ќе се разложува побрзо и со тоа помало количество ќе патува до желудникот и цревата.
Оваа структура со која се предвидува намалување на шеќерот до 40 отсто, „Нестле“ планира да ја воведе во 2018 година.
Иако ова звучи навистина ветувачки, научниците и експертите се прашуваат дали е доволно за да направи значителни промени во нашата секојдневна исхрана?
Марион Нестле, професорка на отсекот за исхрана и јавно здравје на Универзитетот во Њујорк, смета дека е невозможно да се знае дали и колку новиот шеќер на „Нестле“ би внел значителна промена во нашиот начин на исхрана. Зошто? Бидејќи како што потенцира таа, најголемото количество калории коишто ги внесуваме не доаѓа од чоколадите и бонбоните, туку од газираните пијалаци и од тестестите кондиторски производи – печива, торти, слатки, крофни, вафли, еклери и сл.
Според едно истражување спроведено од Министерството за земјоделство и Центарот за превенција и контрола на болести во САД, само 6 отсто од шеќерите што ги внесуваат Американците доаѓаат од бонбони и чоколади. Сепак, новата формула на шеќерот којашто „Нестле“ има планови да ја патентира, според првичните информации не би можело да се користи како соодветна замена за шеќерот во газираните пијалаци или во тестестите кондиторски производи.
