Непријатниот здив во устата често може да биде причинител на неудобност и срам кај личноста која се соочува со овој проблем
Халитоза е состојба во која во устата се појавува непријатен мирис што може да биде предизвикан од повеќе причини, меѓу кои одреден тип на храна, здравствен проблем или лоши навики. Без разлика на причината поради која се појавува, непријатниот здив во устата често може да биде причинител на неудобност и срам кај личноста која се соочува со овој проблем. Непријатниот здив во устата може привремено да се третира или ублажи со различните производи против лош здив, но доколку проблемот трае подолго време, потребно е да се посети доктор или стоматолог.
Причини за непријатен здив
Храна
Храната често може да биде причина за појавата на непријатен мирис во устата. Вообичаено одреден тип на храна може да предизвика привремен лош здив откако ќе се разложи во нашето тело и ќе влезе во крвта која се пренесува до белите дробови. Типови на храна што предизвикуваат непријатен здив во устата се лукот, кромидот, зачинета храна и сл.
Производи што содржат тутун
Луѓето коишто пушат цигари или орално консумираат тутун за џвакање често имаат непријатен мирис на здивот.
Хигиена на забите
Остатоците од храната што ја консумираме остануваат во устата и се разложуваат на и околу забите што може да предизвика непријатен мирис во устата. Редовното и правилно миење на забите и одржување на хигиената на устата се многу важни за да се избегне појава на лош здив во устата. Остатоците од храна, исто така, се лепат на јазикот, оттука негово редовно и секојдневно миење е многу важно.
Сува уста
Плунката помага во дезинфекцијата на устата и отстранување на остатоците од храната што може да предизвика појава на непријатен здив. Состојбата ксеростомија, позната како сува уста, може да придонесе во појавата на непријатен мирис во устата заради намаленото производство на плунка. Сувата уста може да биде привремен проблем кој се појавува во текот на спиењето со што се предизвикува појава на „утрински“ непријатен здив, но исто така може да биде предизвикана заради проблем со плунковните жлезди и сл.
Лекови
Одредени лекови можат индиректно да ја предизвикаат состојбата ксеростомија, односно сува уста, а со тоа и појавата на непријатен здив, додека други при разложувањето во телото да ослободат токсини што влијаат на промената на нормалниот мирис во устата.
Здравствени проблеми
Многу здравствени проблеми како расипани заби, проблем со непцата или инфекции во устата, како и постоперативни рани може да предизвикаат појава на непријатен здив во устата. Посериозни болести, меѓу кои и ракот, хронични состојби како гастроезофагеална рефлуксна болест, како и проблеми со метаболизмот често може да се причина за појава на лош здив во устата.
Симптоми
Мирисот на непријатниот здив во устата може да биде различен во зависност од проблемот заради кој се појавува. Многумина коишто имаат лош здив во устата не се свесни дека соочуваат со проблем бидејќи понекогаш е тешко самостојно да се препознае оваа состојба. За да избегнете појава на непријатен здив, редовно одржувајте ја хигиената на забите и јазикот, внимавајте на исхраната, правете чести прегледи на стоматолог и правилно хидрирајте го телото.
Кога да посетите лекар?
Ако забележите дека вашиот здив е невообичаен најпрво променете ги навиките за орална хигиена, мијте ги забите и јазикот по секој оброк и пијте повеќе вода. Доколку мирисот останува непроменет или се влошува консултирајте се со вашиот матичен доктор или стоматолог за да ја пронајдете причината за појавата на непријатниот здив во устата.
