Лековите коипшто се даваат без рецепт имаат предупредување за возачите да обрнуваат особено внимание на несаканите последици пред да седнат зад воланот
Управувањето со моторно возило претставува сложен ментален и физички процес што бара многу концентрација од страна на личноста која седи зад воланот. Лековите коишто одат на рецепт, често имаат уште посложени листи со предупредувања. Институтот за здравствена заштита и информатика – IMS, откри дека на луѓето на возраст од 65 до 79 години, им се препишуваат повеќе од 27 рецепти за лекови годишно. Земањето на пет или повеќе медикаменти дневно може значително да ја намали способноста за безбедно возење.
Најчестите ризици од земањето на дневните лекови додека возите се поспаноста, задоцнета реакција, проблеми со концентрација.
Додека возењето дава слобода и чувство на одговорност, разбирањето на потенцијалните несакани ефекти на возењето под дејство на препишаните лекови е важно за секого, особено за постарите лица. Секој лек ја има способноста да предизвика несакани последици коишто негативно може да влијаат врз вашата способност да возите фокусирано и правилно. Лековите за алергии, релаксаторите на мускули, антидепресивите, лековите за спиење и лековите против болки, па дури и некои лекови за слабеење, се најчестите лекарства коишто можат да предизвикаат сериозни проблеми кога се вози автомобил.
Несаканите последици често се зголемуваат кога се комбинираат со други лекови, вклучувајќи и билни суплементи и лекови без рецепт. Ова е една од причините зошто е толку важно да се проучат предупредувањата од производителот за секој лек што го користиме и да разговарате со вашиот лекар или фармацевт. Лековите често може да ве направат поспани кога возите. Слабата концентрација кога сме активно вклучени во сообраќајот е фатална не само за нас. Кога возиме одговараме за сите и загрозуваме многу туѓи животи, доколку не сме потполно способни да управуваме.
Комбинирањето на лековите со алкохол е фатално и може драстично да ги нагласи несаканите последици.
Заматен вид, онесвестување, гадење, раздразливост, се исто така добро познати и чести несакани последици. Кога земате нов лек, затоа што несаканите последици кај секого се пројавуваат различно и секој има различно ниво на (не)толерантност, не треба да возите сè додека точно не се запознаете со начинот на кој тој лек делува врз вас.
Сè додека не сте целосно сигурни дека сте подготвени да управувате, не седнувајте зад волан.
Доколку морате да возите под дејство на лекови, најпрво мора да знаете на кој начин тие ќе делуваат врз вашата психа и способност за реагирање. Затоа најдобро е да се консултирате со лекар, кој може да го промени лекот на сличен лек со помалку несакани последици или пак, може да ви ги намали или прилагоди дозите за да се намали негативното влијание на истиот. Исто така, потребно е да се знае дека толерантноста кон некои лекови се намалува со зголемување на возраста.
