Голема интернационална студија откри шеесет генетски варијанти кои ја поврзуваат ниската родилна тежина со зголемен ризик од висок крвен притисок, дијабетес тип 2 и срцеви заболувања
Голема меѓународна студија откри шеесет генетски варијации кои можат да влијаат врз родилната тежина и зголемувањето на ризикот за појава на дијабетес тип 2, како и врз појава на срцеви заболувања и висок крвен притисок во подоцнежниот живот. Студијата дава нови докази како начин наизглед неповрзани заболувања се поврзани преку нашите гени.
Фасцинантно е да се види како гените кои играат улога врз родилната тежина, имаат улога и при појава на различни заболувања. Преку проучувањето на тие гени, може да се види кои протеини се вклучени и даваат различни знаци на механизмот кој може да доведе до тие заболувања. Во новата студија, научници од 116 различни истражувачки центри насекаде во светот заеднички работеле на создавање на гигантска база на податоци.
Тие споредувале гени на 153 илјади лица со нивната родилна тежина и ризикот за развој на болести на метаболизмот. Долго време се сомневале дека родилната тежина влијае врз ризикот на развој на различни заболувања во текот на животот.
За време на истражувањето, пронашле генетски варијанти кои влијаат врз родилната тежина и ги искористиле истите да ги пронајдат гените кои прејудицираат срцеви заболувања, проблеми со крвниот притисок и дијабетес тип 2.
Самото истражување имало двоен пристап. Најпрво, научните работници користеле геноми и родилна тежина, за да идентификуваат релевантна варијација на гените, за потоа да истражуваат дали новооткриените генетски варијации биле присутни кај луѓето со овие заболувања, при што познатите пет до шест генетски варијации кои можеле да влијаат врз родилната тежина, одеднаш пораснале на шеесет.
Професорот по медицинска генетика и болести, Адрес Борглум кој не бил вклучен во истражувањето, вели дека резултатите од истото се возбудливи и дека даваат повеќе податоци од претходните истражувања на оваа тема. Според него, тие даваат силна поддршка за да се види кои гени влијаат на родилната тежина и како тие се поврзани со болестите кои се јавуваат во подоцнежниот живот.
Борглум потенцира дека студијата всушност истакнува дека децата со ниска родилна тежина имаат помали шанси да станат лица со зголемена тежина, но тоа не го намалува нивниот ризик за да развијат некое метаболно заболување кое е генетски детерминирано, како што е генетски детерминирана нивната ниска родилна тежина. Дебелината, сама по себе, генерално е поврзана со зголемениот ризик од овие заболувања. Студијата дава увид во некои механизми и области за да може да се продолжи со проучување, со цел да се разбере причината за појава на двата вида дебелина и широко распространетите болести.
