izgled-na-novorodence-vo-prvite-nekolku-denovi2
Споделете со пријателите!

Иако секое новородено е најубавото нешто за неговите родители, неретко тие истовремено се и прилично изненадени од неговиот надворешен изглед при првиот контакт.
На прв поглед кај новороденото главата е релативно несразмерно поголема од телото. Главата може да изгледа издолжено, како резултат на поминувањето низ породилниот канал. На главата постојат неколку меки делови, каде костите на черепот не се сеуште сраснати, и тие места ги викаме фонтанели. Предна или голема фонтанела се наоѓа отприлика на средина на темето и има облик на ромб. Задната или мала фонтанела има облик на триаголник и се наоѓа помеѓу темето и тилот. Постојат и странични фонтанели но тие не се така воочливи и се доста помали.

Косата кај новороденото воглавно е свиленкаста, нежна понекогаш и густа, најчесто со темна боја, но има и новороденчиња кои имаат плава или црвенкаста боја на коса веднаш по раѓањето. Очните капаци во првите денови обично се дискретно отечени. Носот обично е потешко прооден, поради отокот на слузницата, кој брзо се губи. Брадата најчесто е лесно повлечена према назад, и релативно помала во однос на големината на усните. Вратот е краток, понекогаш може да биде и асиметричен (поради позиционата положба додека било во матката), и вообичаено во првите недели си ја добива нормалната положба. Градниот кош е бочвест, со присутни млечни жлезди, кои можат да бидат отечени дури и со исцедок на некоја капка млеко, а се поради хормоните пренесени од мајката во текот на бременоста.

izgled-na-novorodence-vo-prvite-nekolku-denovi

На кожата на грбот може да се видат влакненца т.н. лануго влакна. По телото, најчесто на челото, тилот и очните капаци, може да се видат капиларни хемангиоми (црвени флеки со различна големина), кои најчесто се губат во првите месеци. На носето, а поретко на образите и брадата, може да се забележат т.н. милии или бели ситни точки, кои се резултат на недоразвиени лојни жлезди и затнати пори. Истите сами од себе поминуваат без лечење. Неретко кожата на рацете и нозете се лупи поради тоа што пред крај на бременоста слојот кој ја штити кожата на фетусот се губи, и под дејство на плодовата вода кожата се набира, и по раѓањето се суши па може да испука и да се лупи. Рацете и нозете на новороденото во првите неколку дена се свиткани во зглобовите и приближени кон телото. На долната третина на стомачето се наоѓа папчето, кое отпаѓа најчесто во првите десетина дена.

Прочитајте:  Заспивање со телефон во рака значи лошо здравје

Се надеваме дека ви помогнавме да бидете поподготвени за првата средба со вашето најмило.


Споделете со пријателите!