Лекар треба да се консултира доколку се присутни некои од овие симптоми: честа потреба за уринирање, болно уринирање, крв во урина
Бенигна хиперплазија на простатата е немалигно зголемување на простатата, кое често се случува кај постари мажи. БХП е многу често заболување. Речиси половина од мажите над 50 години развиваат симптоми на злолемена простата, но на само 10% им е потребен хируршки третман. БХП генерално почнува во триесеттите, развивајќи се бавно, со што симптомите се појавуваат по педесеттите.
Кај мажите се лачи тестостерон и мала количина на естроген. Со текот на годините количеството на активен тестостерон во крвта се намалува, оставајќи поголемо количество на естроген. Студиите направени кај животни покажуваат дека причината за БПХ може да е високото ниво на естроген, со што жлездата ја зголемува активноста, што води кон зголемување на самата простата.
Друга теорија се фокусира на дихидротестостеронот, супстанција чиј прекурсор e тестостеронот во простатата. Од истражувањата што се вршеле врз животни, се покажало дека повеќето од нив како што стареат ја губат способноста да да лачат ДХТ. И покрај ова тврдење, кај постарите мажи сѐ уште се лачи високо ниво на ДХТ. При намалувањето на нивоата на тестостерон постарите мажи продолжуваат да лачат и да се акумулираат високи дози на ДХТ, што доведува до зголемување на клетките на простатата. Потврдено е дека кај мажите кај кои не се лачи ДХТ не се развива БХП. Кај оваа болест простата расте со што ја притиска уретрата. Ова предизвикува задржување на урината и потреба за почесто уринирање.
Други вообичаени симптоми се бавен проток на урина, итна потреба за мокрење и тешкотии при мокрење. Посериозни проблеми вклучуваат инфекции на уринарниот тракт и целосна блокада на уретрата, која може да доведе до повреда на бубрезите.
Најдобра заштита од БПХ се редовни медицински прегледи, кои вклучуваат испитување на простатата. Треба да се посети лекар доколку се присутни некои од овие симптоми: честа потреба за уринирање, болно уринирање, крв во урината. Редовните прегледи се многу важни, па дури и за оние кои имале хируршки зафат. Операцијата не заштитува од рак на простата, само дел од простатата е отстранет.
Д-р Благоја Здравев, специјалист уролог
