Дебелината се повеќе станува проблем на населението во развиените земји, а најчесто е резултат на начинот на живеење, исхраната т.е. прекумерниот и неурамнотежениот внес на храна и, намалената физичка активност. На дното на листата можеме да ги наброиме и метаболичките и хормоналните пореметувања, и одредени други патофизиолошки состојби.
Светската здравствена организација ја смета дебелината за еден од најчестите ризик фактори за појава на низа заболувања (како што се: дијабетес мелитус, одредени видови на малигни заболувања, кардиоваскуларни заболувања итн). Ова значи дека доколку не ја одржувата вашата телесна маса во нормала- изложени сте на поголем ризик за заболување од горенаведените болести. Дебелината е сериозен проблем на денешницата- и за да можете успешно да се справите со неа- прво треба да ја откриете точната причина за вашата дебелина- и потоа да постапите соодветно на утврдената причина. Затоа во продолжение прочитајте за тоа кои се најчести причини за појава на дебелина.
1. Внесената енергија е поголема од потрошената
Не треба да сте голем математичар за да разберете дека кога внесувате повеќе енергија отколку што трошите тогаш се јавува еден вишок на внесена енергија-која не сте успеале да ја потрошите и неа телото најчесто ја складира во форма на масно ткиво.
2. Намалена физичка активност
Доколку професијата ви е таква што не ви дозволува многу физичка активност, или вашиот вообичаен живот е седентарен и не се занимавате со рекреативен спорт, тогаш најверојатно вашиот метаболизам е поспор за разлика од лицата кои се физички активни. Исто така вашите потреби за енергија се помали и повторно ви останува вишок неискористена енергија која се складира во масното ткиво.
3. Начин на исхрана
Доколку основа на вашата исхрана е храна со „празни калории“ (храна со празни калории е храна кој ви дава калории а не и доволна количина на витамини, минерали, ензими и други фитонутриенти) и висококалорична процесирана храна тогаш на вашето тело ќе му недостигаат многу витамини и минерали и метаболичките реакции нема да се извршуваат по нормалните патишта, а тоа може да доведе до непожелно складирање на енергија во облик на масти. Ако основа на вашата исхрана се зеленчук, овошје (во свежа форма), житарици, мешунки и јатки тогаш вашето тело може оптимално да функционира и ефикасно да ги согорува калориите.
4. Хронична употреба на лекови
Одредени лекови може да го менуваат метаболизмот на масти или јаглехидрати и со тоа да придонесат за појава на вишок килограми.
5. Лоши навики
Секогаш кога ќе видиме семејство во кое сите членови имаат прекумерна телесна маса велиме дека „тоа им е наследно“, но во најголем дел од овие случаи наследни се само лошите навики во исхраната и начинот на живеење, а не и дебелината.
6. Генетски причини за дебелина
Научниците се повеќе ја истражуваат генетската основа на дебелината и иако некои резултати не може јасно да се протолкуваат и да се донесат соодветни заклучоци, сепак некои случаи се добро испитани и сега се знае дека некои гени имаат голема улога во развојот на дебелината. Најпозната генетска причина за појава на дебелина е дефицитот на хормонот лептин.
7. Одредени заболувања
Одредени заболувања како хипотироидизам, синдром на полицистични јајници, инсулинска резистенција, се проследени со зголемување на телесната маса.
8. Емоционалните и социолошките причини
Емоционалните и социолошките причини може да влијаат на начинот на кој се храниме и на физичката активност па така индиректно да придонесат за покачување или намалување на телесната маса.
