Убедувањето дека едноставно немате време за вежбање не е валидна причина да не се занимавате со било каква физичка активност
Почнувам со вежбање „Од утре“, „Од први“, „Ама на диета сум, не треба да вежбам“, „Скапо ми е“, се дел од изговорите и оправдувањата зошто не вежбате, а сакате (наводно). Сакате резултати? Доколку одговорот е да, тогаш изговорите треба да ги снема, бидејќи вежбањето и изговорите никако не одат заедно. Секако дека постојат и оправдани причини зошто некој не би требало да вежба, на пример, за време на повреда или болест. Овој пат, ќе ги наброиме најчестите изговори со кои се служат оние кои што го избегнуваат вежбањето. Тие нека ви бидат потсетник секогаш кога ја оправдувате вашата неактивност.
„Немам време“
Овој изговор е несомнено најупотребуван и го користат сите. Најмногу го користат оние кои што не ни сакаат да вежбаат, но чувствуваат грижа на совест. Факт е дека доколку нешто се сака, ќе се најде време. Доколку навистина немате многу време, може да вежбате од дома. Исто така, со вежбањето од дома, ќе победите уште еден изговор, а тој е дека немате пари, бидејќи за вежбање дома не ви е потребно многу, можеби само растегливи ленти и тегови.
„Не сум флексибилен/флексибилна“
Овој изговор најчесто го слушаат учителите по јога и пилатес. Но тие истакнуваат дека токму јогата, односно пилатесот, ве прават флексибилни, затоа овој изговор не поминува.
„Премногу сум изморен/изморена за да вежбам“
Физичката активност всушност ви дава енергија, така што, доколку постојано се чувствувате уморни, време е да станете од кревет и да вежбате. Со вежбањето, за многу брзо време ја поттикнувате циркулацијата и се раздвижувате. Токму затоа, вежбањето е подобро од било кое апче или пак од кафе. Исто така, не значи дека мора да станувате порано за да вежбате. Вежбајте тогаш кога вам ви одговара.
„Вежбањето е досадно“
Сигурно постои некој вид на физичка вежба во која уживате. Немојте да трчате доколку тоа ви претставува тешкотија, бидејќи доколку вежбате нешто што не сакате, тогаш големи се шансите брзо да се откажете. Исто така, вежбањето е поинтересно доколку најдете фитнес партнер.
„Немам мотивација“
Еден од начините да се победи ова состојба на размислување, е да направите конкретен план и да поставите цели. Целите не треба да бидат недостижни и совршени, туку мали и значајни. Исто така, за да се победи немотивираноста, фитнес тренерите го предлагаат принципот „неколку минути“. Тоа значи, колку и да немате желба за вежбање, активирајте се само неколку минути. Важно е да почнете. Искуството покажува дека ретко кој се откажува откако ќе започне со вежбањето.
„Немам резултати“
Ова може да се случи заради неколку причини: не вежбате правилно, не внимавате на храната или очекувате брзи резултати. Бидете трпеливи и почекајте ги првите резултати после 3 месеци, имајќи ги во обзир овие причини.
