Хумористичните ситуации не само што ги развеселуваат, туку и им помагаат на малите дечиња да учат побрзо
Сите знаеме дека смеењето е најдобриот лек, а според едно истражување спроведено од тим на француски научници хуморот може да им помогне на децата да научат нови работи.
Во последната фаза на истражувањето биле вклучени 18 месечни деца и сите тие набљудувале еден возрасен човек како користи помагало за да дофати играчка која не му е на дофат на рака. Во едната група, човекот едноставно си играл со играчката откако ја дофатил, но во другата група човекот откако успеал да ја земе во раце, веднаш ја фрлил на подот, а тоа ги насмеало половина од децата во групата. Кога истражувачите ги споредиле резултатите од двете групи заклучиле дека децата кои се насмеале на постапката од човекот биле способни успешно да ја повторат истата таа постапка, за разлика од децата кои не се насмеале и од децата во групата каде немало хумористична ситуација.
Истражувачите понудиле две можни објаснувања зошто ова се случило. Првото, велат тие, има врска со темпераментот на децата. Децата „смешковци“ можеби имаат поголеми когнитивни способности кои им овозможуваат полесно да комуницираат со другите луѓе и да ги имитираат туѓите постапки.
Второто објаснување според научниците лежи во мозокот. Позитивните емоции, како на пример смеата, можат да го зголемат нивото на допамин во мозокот кој има позитивен ефект врз учењето. Според ова објаснување, фактот дека децата кои се смееле на хумористичната ситуација научиле да ја повторат постапката побрзо, всушност може да е резултат на позитивните емоции.
Сепак, повеќе истражувања би требало да се спроведат за да се потврди фактот дека смеата, односно одредена хумористичната ситуација, влијае позитивно на процесот на учење кај малите деца. Меѓутоа, ова истражување е доста полезно за родителите кои имаат мали дечиња, а сакаат да ги научат на некои навики во домот.
Родители, смејте се!
