Покрај анатомија и биохемија, студентите по медицина во САД изучуваат и „кулинарна“ медицина, односно учат како да зготват здрави оброци за да можат да им даваат практични совети за храната на своите пациенти
Од 2012 година, бруцошите и студентите од втора година од катедрата за медицина при Универзитетот Тјулејн – Tulane University од Њу Орлеанс, Луизијана, покрај стандардните медицински предмети, учат и да готват. Откако започна оваа програма, Школата за медицина од Универзитетот Тјулејн стана првото медицинско училиште кое вработило професионален готвач, како предавач со полно работно време.
Десет проценти од американските медицински училишта ги учат своите студенти како да готват по програмата на Тјулејн, објасни Тим Харлен – Tim Harlan, кој го води центарот за кулинарна медицина при Универзитетот Тјулејн – Goldring Center for Culinary Medicine. Исто така, достапни се и програмите за континуирана медицинска едукација со сертификат за кулинарна медицина за доктори, лекари асистенти, медицински сестри, фармацевти и регистрирани диететичари.
Програмата, развиена во соработка со кулинарното училиште Johnson & Wales, им помага на докторите да им дадат реален здравствен совет на нивните пациенти, вели Харлен, кој истовремено е готвач и лекар. „Ние не зборуваме за нутриционистиката, ние зборуваме за храната“ – истакнува д-р Харлен.
Часовите по готвење, се надополнети со предавања, читање, но и тимско решавање на проблеми. Во модулите за прва и втора година, вклучено е проучувањето на медитеранската диета и основните вештини за ракување со нож. Харлен вели дека работат на развивање на околу 30 додатни модули за студентите од трета и четврта година, во кои ќе бидат вклучени кулинарните потреби кај специфичните болести како конгестивна срцева слабост, ХИВ и Целијакија.
Креаторите на оваа програма – готвачите и лекарите, се надеваат дека ова ќе биде клучен пресврт во начинот на кој докторите комуницираат со своите пациенти за нутриционистиката, особено во моменталните услови кога стапката на дебелина е во пораст, како и појавата на други болести поврзани со исхраната. Во моментов помалку од половина од американските матични лекари се во состојба да им понудат на своите пациенти специфични насоки во врска со исхраната, физичката активност или контролата на тежината, потврди едно истражување од 2011 година.
„Фактот што докторите сега учат да готват е како револуција“ – рече Сем Кас – Sam Kass поранешен готвач од Белата Куќа.
Покрај тоа што сè уште е рано да се зборува за резултатите од оваа програма, сепак тие веќе постојат. Не само што идните доктори ќе бидат подговтвени да разговараат за исхраната со своите пациенти, туку и студентите по медицина кои учествуваат во програмата започнале повеќе да се грижат за својата исхрана со јадење на повеќе зеленчук и овошје.
