Прочитајте за благодетите од сушеното овошје
Сушеното овошје стекнува сè поголема популарност, благодарение на новите трендови во исхраната, чиј главен фокус е здравјето и важноста од здрава исхрана. Сушеното овошје содржи есенцијални минерали, витамини, здрави шеќери, фитонутриенти и хранливи влакна и се поврзува со добро здравје. Сушеното овошје изобилува со калиум, којшто е корисен за мускулите и нервниот систем и магнезиум, којшто е многу важен за правилно апсорбирање на калциумот. Сушеното овошје содржи и железо и претставува идеален антиоксидантен коктел со витамини и бета каротен, кој се бори против слободните радикали. Содржи многу хранливи влакна и е одличен извор на антиоксиданси, особено полифеноли.
Факти и заблуди
Може да најдете многу информации и податоци за сушеното овошје, коишто најчесто одат во крајности – некои тврдат дека е исклучително здрава храна со голема хранлива вредност, додека други сметаат дека сушените овошја не се подобри од чоколадо.
Заблуда број еден е дека сушеното овошје изобилува со калории, бидејќи содржи многу шеќер. Овие две работи не се точни.
Сувото овошје во споредба со свежото овошје, содржи скоро исто калории и шеќер. Овде во обзир треба да се земе количината на сушено овошје.
Во 100 грама сушен ананас има 245 калории, банана околу 300 калории, брусница 308 калории, суво грозје 246, јаболко 280, урми 284, итн. Колку за споредба, 100 г суво овошје во просек содржи 290 kCal, додека слатките содржат околу 500 kCal. Имено, индустриските слатки најчесто содржат бел шеќер адитиви и конзерванси а сувото овошје содржи овошен шеќер. Сепак, не треба да се претерува, бидејќи многу фруктоза може да има негативни здравствени ефекти. Заклучокот е дека подобро пред вас да имате суво овошје наместо чипс, или уште подобро микс овошје и јатки.
Сувото грозје е здрав и вкусен извор на природен шеќер, богат со калциум и железо. Одлично е за оние со висок холестерол и може да биде идеална замена за здрави грицки. Има висока содржина на флуор, бакар и на калиум. Има ниска до средна вредност на гликемиски индекс и низок инсулински индекс. Бројни истражувања имаат докажано дека го намалува крвниот притисок, го регулира нивото на шеќер во крвта, ги намалува инфламаторските маркери и дава чувство на ситост. Сувото грозје е одамна присутно во нашата кујна и се користи како додаток во многу оброци. Содржи многу хранливи влакна и е без маснотии. Помага при состојби на исцрпеност, умор како и при варење на храната. Затоа е добро да се јаде во склоп на утринскиот оброк.
Сушената брусницата има антигабично и антивоспалително дејство. Таа се смета за природен антибиотик кој ги уништува штетните бактерии во телото. Изобилува со антиоксиданси, органски киселини, бета каротин, витамин Б и многу други минерали. Содржи и многу фитоматерии и омега 3 масни киселини. Биофлавоноидите што ги содржат имаат посебно антибактериско дејство.
Сушениот ананас е намирница со среден гликемиски индекс, што значи постепено зголемување на нивото на глукоза во крвта и контролирано лачење на инсулин што овозможува ослободување на енергија подолг период. Не содржи маснотии и изобилува со минералот манган. Тоа што е природен извор на манган е многу важно, бидејќи манганот игра значајна улога во метаболизмот на храната, функционирањето на нервниот систем и производството на половите хормони. Тој има антиосидирачко дејство и затоа му се препишуваат превентивни својства од неколку заболувањата.
Поради тоа што при процесот на сушење овошјето губи вода, сувото овошје може да ги изгуби витаминот Ц и фолната киселина, бидејќи овие состојки се растворливи во вода. Меѓутоа другите витамини остануваат во исто количество како и пред сушењето, со таа разлика што овошјето губи од својата маса.
Претставува голем извор на енергија
Сушеното овошје е одличен извор на железо, кое дава физичка и ментална енергија и кое се користи против анемија. Обезбедува додатна енергија. Ваквиот извор на енергија брзо патува во крвотокот а особено се препорачува на спортистите после напорниот тренинг.
Кога да се јаде
Нутриционистите советуваат сушеното овошје да се јаде за појадок или за ужина бидејќи го потпомогнува варењето и никако не треба да се јаде по главниот оброк. Избегнувајте да го јадете после главен оброк бидејќи го забавува варењето а носи дополнителни калории. Идеално е за појадок а витамините што ги содржи го одржуваат вашиот имунитет. Треба да се јаде во мали количини и во комбинација со друг вид на храна. Изберете микс овошје (сушена брусница, сушен ананас, суво грозје) и јатки (бадеми, лешници), мешавина од јаткасти плодови и сушено овошје. Ваквата комбинација е високо енергетски производ што ќе ви овозможи енергија за физичка подготвеност во текот на денот.
Предностите од сушеното овошје е дека трае многу подолго од свежото овошје и претставува здрав избор за грицки на работа, додека патувате или било каде, каде што нема фрижидер.
Додајте сушено овошје и малку јаткасти плодови на вашиот корнфлекс, мусли, јогурт или смути.
