Сите сме се соочиле со ваква ситуација во нашиот дом, но дали знаеме колку всушност влагата и мувлата можат да бидат штетни за нашето здравје
Влагата во домот заедно со лошата вентилација на воздухот создаваат совршени услови за појава на мувла. Најчесто мувлата се појавува во бањата, кујната, подрумот, водоводните цевки и на други места каде постои влага. Може да се појави и на ѕидот, тепихот и мебелот доколку овие површини останат влажни подолго време. Влагата најчесто се шири од кујната и бањата каде се создава пареа која може да кондензира и да се претвори во капки вода. Кондензацијата најчесто се случува на прозорците и во ќошевите на собите кои се поладни и каде што има помало циркулирање на воздухот.
Здравствени проблеми како резултат на мувлата
Мувлата може да предизвика проблеми со нашето здравје, особено доколку подолго време сме изложени на нејзиното влијание. Таа може да ослободи лош мирис и да ве натера да кивате поради одредени честички што ги ослободува во воздухот. Кивањето не значи дека сте алергични на мувла, но кај некои луѓе може навистина да се појават симптоми кои укажуваат на алергија:
- Астма или некои други респираторни болести;
- Чешање, солзење и црвенило во очите;
- Главоболка или мигрена;
- Хронична кашлица;
- Проблеми со синусите;
- Затнат нос;
- Замор;
- Осип на кожата;
- Често кивање.
Некои видови на мувли се причина за создавање на микотоксини кои можат да бидат доста опасни за нашето здравје. Изложеноста на високи нивоа на микотоксини може да предизвика и невролошки проблеми. Доколку забележите било какви проблеми со вашето здравје како резултат на мувла препорачливо е веднаш да се обратите на лекар.
Што може да се направи за да се намали влагата во воздухот и појавата на мувла?
Влагата и појавата на мувла може да се контролираат на неколку начини:
Вентилација на воздухот (проветрување)
Проветрувајте ги собите за да се намали нивото на влага во домот. Не ги заборавајте и подрумот и таванот. Можете да поставите и уреди како вентилатори или аспиратори кои ќе ви помогнат да се ослободите од пареата која секојдневно се насобира во кујната или бањата.
Затоплување
Затоплувајте го домот така што ќе одржувате константна температура кога времето е ладно или влажно, а исто така се препорачува да се затоплува и бањата. Влагата би требало да се одржува на нормално ниво. Постојат мерачи на температура и влага кои може да ви помогнат во одржувањето на нивото на влагата.
Изолација
Кондензација настанува најчесто на ладни површини како ѕидовите или таванот на пример. Со помош на изолација таквите површини можат да станат потопли и со тоа значително би се избориле со ваквиот проблем.
