anafilaksa-znaci-simptomi-prva-pomosh_image
Споделете со пријателите!

Анафилаксата предизвикува имунолошкиот систем да ослободи големо количество на хемикалии кои можат да предизвикаат шок кај лицето.
Анафилакса е алергиска реакција којашто е опасна по живот – таа може да предизвика шок, ненадеен пад на крвниот притисок и проблеми со дишењето. Кај луѓе коишто имаат алергија, анафилаксата може да се појави неколку минути по изложеноста на одредена супстанција (алерген) која ја предизвикува нивната алергија. Во некои случаи, анафилаксата може да има одложена реакција или може да настане без очигледен провокатор.

Анафилаксата предизвикува имунолошкиот систем да ослободи големо количество на хемикалии кои можат да предизвикаат шок кај лицето. Во овој случај, крвниот притисок ненадејно се намалува, а дишните патишта се стеснуваат, блокирајќи го дишењето.

Знаци и симптоми на анафилакса

Анафилаксата може да се препознае по тоа што претставува тешка алергиска реакција којашто честопати има видливи симптоми и знаци како:

  • Кожни реакции, вклучувајќи пликови, чешање и црвена или бледа кожа;
  • Отекување на лицето, очите, усните или грлото;
  • Стегање на дишните патишта, што доведува до отежнато дишење и проблеми со дишењето;
  • Слаб или брз пулс;
  • Гадење, повраќање или дијареа;
  • Вртоглавица, несвестица или несвесност.

Анафилаксата може да биде предизвикана од:

  • Лекови;
  • Храна – кикирики, ореви, риба или школки;
  • Убод од инсекти, пчела, оса, стршлен и сл.

Како да препознаете и да помогнете во случај на анафилакса

Доколку дојдете во ситуација да забележите дека некој во ваша близина има сериозна алергиска реакција којашто се манифестира со вообичаените знаци и симптоми на анафилакса и сакате да помогнете треба:

  • Да повикате брза помош;
  • Да го прашате лицето дали носи епинефрин автоинјектор за лекување на алергиски напад;
  • Да помогнете со позиционирање на лицето да лежи на грбот;
  • Доколку носи тесна облека, да помогнете да се олабави и да го покриете;
  • Да не му давате на лицето ништо за пиење;
  • Ако повраќа или крвари од устата, да го свртите на една страна на телото за да се спречи задушување;
  • Ако нема знаци на дишење, кашлање или движење, доколку знаете како, да започнете со вештачко дишење со непречено притискање на градите додека не пристигне итната помош.
Прочитајте:  Синузитис кај деца

Важно е да се напомене дека дури и ако симптомите почнуваат да се подобруваат потребно е да се набљудува ситуацијата бидејќи во случај на анафилакса, можно е да се повторат симптомите. Ако сте со некој кој има знаци и симптоми на анафилакса, не чекајте да видите дали симптомите се подобруваат. Веднаш побарајте итна помош или однесете го лицето во болница. Во тешки случаи, нетретираната анафилакса може да доведе до смрт во рок од половина час.

Антихистаминско апче, како што е дифенхидрамин, не е доволно за лекување на анафилакса. Овие лекови можат да помогнат во олеснување на алергиските симптоми, но делуваат премногу бавно во случаите на потешки алергиски реакции за коишто треба да се реагира навремено.


Споделете со пријателите!