Симптомите на астма се познати, но никогаш до сега не била идентификувана основната причина
Научен труд објавен во „Science Translational Medicine“ наведува дека основниот корен на астмата е најден и дури е предложен и потенцијален кореткивен третман за да се поништат сите симптоми.
Астмата е стегање на дишните патишта кои му овозможуваат на воздухот да влезе и да излезе од белите дробови и влијае на околу 300 милиони луѓе низ целиот свет. Симптомите, кои вклучуваат отежнато дишење, скратен здив, и стегање во градите, често се предизвикани од вежбање, инфекции, честички прашина и грини, влакна од крзно на разни животни, полен или разни загадувачи, и прават болните да имаат потешкотии при дишењето. Многу третмани за да се спречат и да се ублажат симптомите се на располагање, но околу еден во дванаесет пациенти слабо реагираат на сегашните третмани.
Познато е дека симптомите на астма се јавуваат како резултат на стеснување на дишните патишта, дебелината на истите и воспалителните процеси на дишните патишта, но никогаш не е идентификувана основната причина… барем не до сега.
Истражувачкиот тим ги проучувал моделите на астма кај глувци и ткива од човечките дишни патишта од астматични и не-астматични лица и откриле дека симптомите на астмата се поврзани со активирање на калциум сензорните рецептор – CaSR. Ова предизвикува еден синџир на реакции што резултира со стеснување на мазните мускули на дишните патишта (ASM). Исто така откриле дека луѓето со астма имаат поизразен CaSR од луѓе кои не страдаат од астма.
Главениот истражувач, професор Даниела Рикарди – Daniela Riccardi од Универзитетот Кардиф – Cardiff University коментира: „Нашите наоди се неверојатно возбудливи. За прв пат најдовме врска помеѓу воспаленијата на дишните патишта, кои можат да бидат предизвикани од еколошки фактори – како што се алергени, чадот од цигарите и автомобилските гасови – и грчењето на дишните патишта при алергиска астма. Нашето истражување покажува како овие предизвикувачи ослободуваат хемикалии што ги активираат CaSR во дишните патишта и ги поттикнуваат симптомите на астмата како грчењето на дишните патишта, нивно воспаление и стеснување. Користејќи калцилитици – calcilytics, небулизирани и инхалирани директно во белите дробови, покажавме дека е можно да се деактивира CaSR и да се спречат сите овие симптоми “.
Лекови кои ги блокираат CaSR веќе постојат – калцилитици. Тие беа развиени како потенцијална терапија за остеопороза, но беше покажано дека имаат ограничена ефикасност за оваа индикација. Најновите истражувања покажаа дека третманот со калцилитици ја спречува прекумерната активност на CaSR во дишните патишта погодени од астма, што претставува потенцијален третман кој може да допринесе астмата да престане да се случува на прво место. Бидејќи калцилитицете веќе се покажаа како безбедни за употреба кај луѓето, може да се случи за само неколку години тие да се на располагање за лекување на астма, ако овие наоди се потврдат во клиничките испитувања.
Д-р Саманта Вокер – Samantha Walker, директор за истражување и креирање политики на „Астма Велика Британија“ – Asthma UK, која помогна во финансирањето на истражувањето, вели: „Ова многу возбудливо откритие ни овозможува, за прв пат, да се справиме со основните причини за симптомите на астмата. Пет проценти од луѓето со астма не одговараат на сегашните третмани па откритијата од истражувањето може да им го сменат животот на стотици илјади луѓе“.
