Пробиотиците како прв избор за третман на инфантилни колики
Цревните колики, исто така познати како инфантилни колики, се дефинираат како плачење по 3 часа дневно, повеќе од 3 дена неделно, во период од 3 недели кај здраво бебе. Претставуваат раширена клиничка состојба и најчести симптоми се интензивен и неутешен плач кој е проследен со грчеви на лицето, грчење на нозете и испуштање на гасови. Гласното и долготрајно плачење може да трае повеќе часови, неколку дена во неделата. Вообичаен период е од 6 часот попладне до полноќ, но некои деца плачат и во текот на денот.
Се претпостува дека настануваат заради ГИТ дискомфорт и недоразвиена цревна микрофлора.
Третманот на коликите може да биде најразличен, меѓутоа најновите истражувања ги потенцираат пробиотиците како прв избор за третман. Постојат и медикаменти кои кај возрасните ја намалуваат количината на гасови во цревата, а кој може да биде од помош и кај бебињата. Едните се базирани на Simethicone, кој не се абсорбира од цревата и не дава нус ефекти што го прават безбеден за користење.
Од пробиотиците кои се препорачуваат, ќе го издвоиме пробиотикот Lactobacillus reuteri. Механизмот на дејство на пробиотикот не е во потполност разјаснет, но според постоечките студии има влијание во намалување на симптомите на детските колики. Lactobacillus reuteri се добри бактерии кои помагаат во одржување на здрава рамнотежа во цревната микрофлора. Бројни клинички испитувања потврдуваат дека користењето на производи со Lactobacillus reuteri значително го намалуваат периодот на плачење кај доенчињата со грчеви.
Со континуирана употреба во период од 4 недели се намалува времетраењето на плачење на помалку од 3 часа месечно. Се даваат 4 капки, еднаш дневно, независно од оброкот. Може да се дадат директно во уста или во ладно млеко или чај. Двојно повеќе го намалува времетраењето на плачење во однос на некои други хемиски препарати.
Д-р Даниела Жабева – специјалист педијатар
