Многумина не се задоволуваат само со јогата и започнуваат да практикуваат јогалатес.
Јогата е источна индиска традиција која се фокусира на сила, флексибилност и духовност. Пилатесот е создаден од Јозеф Пилатес пред речиси еден век. Пилатесот се фокусира на создавање сила во мускулите во делот на абдоменот, којшто е јадрото на телото. Јогалатесот е физичка активност која ги соединува јогата и пилатесот. Таа прв пат започнува да се практикува во 1997 година од страна на овластен инструктор за пилатес и личен тренер Џонатан Урла.
И двете практики вклучуваат постигнување на одредени ставови. Двете истакнуваат правилно дишење и ја нагласуваат медитативната свесност. Шерил Леоне, сертифицирана јога инструкторка во „Gentle Strength Yoga“ во Денвер, САД, којашто вежба јогилатес вели дека постои голема синергија меѓу двете практики бидејќи нивните слични филозофии прават да може да се спојат на многу природен начин.
Многу инструктори и тренери имаат позитивно мислење за јогалатесот. Меѓу нив е и фитнес инструкторката Мег Џордан. Таа потенцира дека постои прекрасна симбиоза помеѓу јогата и пилатесот.
„Комбинацијата од двете е временски ефикасна. Јогалатесот може да го вежбаат многумина. Како инструктор по фитнес, можам да кажам дека многумина кои сакаат да го подобрат мускулниот тонус, да добијат послаба фигура или да истакнат специфични делови од телото не се задоволни само со јогата и, оттаму, започнуваат да практикуваат јогалатес“, вели Џордан.
Таа, исто така, ги забележала можностите за комбинирање на најдоброто од јогата и пилатесот, како што таа ја опишува во нејзината книга од 1999 година, „The Fitness Instinct“.
Џордан вели дека возрасната популација наречена беби-бумери не е заинтересирана за физички исцрпувачки вежби. Доколку спаѓате во оваа група можете да добиете максимални резултати во однос на стомачните и грбните мускули практикувајќи ја оваа мешавина од јогата и пилатесот. Таа има бројни придобивки во превенцијата на повреди, како и во зајакнување на грбните и стомачните мускули.
Сепак, мислењата се поделени и не секој ја одобрува оваа физичка активност. Линда Спароу, инструктор по јога и автор на книгата „Yoga for Healthy Bones“, вели дека не е обожавател на јогалатесот и претпочита овие две практики да се одделат и да се практикуваат засебно, наместо да се комбинираат.
„Чувствувам дека ги претвора двете практики во нешто што не се. Јогалатесот функционира во фитнес центри, бидејќи луѓето таму често не се запознаени со ниту една од овие практики, па за нив оваа дисциплина претставува убав вовед, но јогата е подлабока пракса. Таа ги поврзува телото и умот“, потенцира Спароу.
