Јаворовиот сируп како природен засладувач често се користи во исхраната, а канадските научниците сугерираат дека овој сируп може да го заштити мозокот од Алцхајмерова болест
Истражувачите од Универзитетот во Торонто и Универзитетот од Род Ајленд, и покрај раните стадиуми од нивното истражување, тврдат дека јаворовиот сируп претставува нова надеж за пациентите со мозочни заболувања. Според нив, јаворовиот сируп ги заштитува мозочните клетки – невроните. Д-р Навиндра Сирам – Navindra Seeram заедно со д-р Доналд Вивер – Donald Weaver беа двајца од многуте научници што ги претставија новите наоди за природните производи и тоа како тие можат да ги спречат и излечат невродегенеративните болести, за време на годишниот симпозиум на „American Chemical Society“ изминатиот месец.
„Природните прехранбени производи како што е зелениот чај, црвеното вино, бобинките, куркумата и калинката се постојано проучувани за нивните потенцијални придобивки во справувањето со Алцхајмеровата болест. И сега, во прелиминарните лабораториски студии врз Алцхајмеровата болест, екстрактите од јаворовиот сируп од Канада покажаа невропротективни ефекти, слични на ресвератролот, соединение кое што се наоѓа во виното“ – истакна д-р Навиндра Сирам.
Нивното истражување покажа дека екстрактот од јаворов сируп може да го спречи и стопира згрутчувањето на протеините во мозочните клетки, особено тау-пептидите.
Токму оваа појава на наталожување на тау-протеините, претставува водечка причина за појава на мозочни нарушувања кај спортистите. Во другите студии претставени на симпозиумот, лекарите сугерираа дека екстрактот од чист јаворов сируп го стопираше згрутчувањето на другите протеини во мозоците на стаорците, а истите состојки помогнаа во заштитата на мозокот на заморчињата.
Сепак, д-р Сирам додава дека се неопходни понатамошни клинички студии за да се потврдат овие иницијални наоди. „Здравјето на мозокот е најнова тема за истражување и ние со нетрпение очекуваме да дознаеме повеќе за потенцијалните придобивки што јаворовиот сируп може да ги има во оваа област“ – додаде Серџ Боли – Serge Beaulieu претседателот на Федерацијата на производители на јаворов сируп од Квебек. Кај нас, за жал, ретко може да се најде квалитетен јаворов сируп. Но, за среќа на нашиве простори го имаме гроздовиот маџун, кој за нас најверојатно е дури и подобар од него, но сè уште не ги знаеме неговите потенцијални заштитни придобивки за нашиот мозок.
