ishranata-zdravjeto-na-zabite-na-vasheto-dete_image
Споделете со пријателите!

Овошјето и зеленчукот се добра алтернатива за закуска наместо храната којашто содржи јаглехидрати.
Навиките во исхраната и грижата на забите во голема мера влијаат врз здравјето на забите кај децата. Премногу јаглехидрати, шеќер (содржан во торти, колачиња, бонбони и друга слатка храна и пијалаци) и скроб може да предизвикаат болка и расипување на забите. Колку долго јаглехидратите се задржуваат на забите, како и колку често децата ги четкаат забите се клучни за спречување на расипување и распаѓање на детските заби.

Она што треба да го направат родителите е да ги едуцираат своите деца за типовите на храна и како некои состојки влијаат на здравјето на нивните заби. Дополнително да ги научат да прават здрави избори уште на рана возраст, како и редовно да водат грижа за забите и да одат на посета кај стоматолог.

Овошје и зеленчук како алтернатива

„Едукација на децата за типовите на храна и како некои состојки влијаат на здравјето на нивните заби.“

Овошјето и зеленчукот се добра алтернатива за закуска наместо храната којашто содржи јаглехидрати. Овошјето и зеленчукот кои содржат голема количина на вода, како што се круши, дињи, целер и краставици, се најдобри за здравјето на забите на децата. Од друга страна, бананата и сувото грозје содржат концентриран шеќер, оттука, се препорачува детето да не ги консумира прекумерно или доколку јаде да ги измие своите заби веднаш по јадењето.

Храна којашто се лепи и задржува на забите

Храната којашто се лепи на забите, како суво грозје, суви смокви, овесни снегулки, гумени бонбони, карамел, мед, лижавчиња и цврсти бонбони оневозможуваат плунката да го исчисти шеќерот од забите. Доколку вашето дете ги консумира овие типови на производи треба веднаш по јадењето да ги измие своите заби.

Слатки по ручекот

Кога децата јадат слатки, најбезбедно е да ги јадат веднаш по ручекот бидејќи тогаш постои зголемена количина на плунка во устата со што полесно се чисти храната од забите. Пијалаците што се консумираат за време на јадењето, исто така, може да помогнат да се исчистат остатоците од храна од забите.

Прочитајте:  Синдром на „тресено бебе“ - форма на насилство

Помалку закуски

Фреквенцијата на јадење закуски е многу поважна од количината којашто се консумира. Имено, времето помеѓу оброците овозможува плунката да ги измие честичките од храната на кои бактериите би се закачиле. Честите закуски по кои децата не ги четкаат своите заби предизвикуваат постојано хранење на бактериите што доведува до расипување на забите. Обидете се да ги ограничите закусите колку што е можно повеќе и да не му дозволувате на детето да јаде повеќе од еднаш до два пати во денот, притоа учејќи го да ги мие своите заби веднаш по јадењето.

Вода наместо сок

Научете го вашето дете почесто да пие обична вода наместо сокови бидејќи тие содржат големо количество на шеќер. Водата не им штети на забите и помага за чистење на остатоците од храна што може да се задржат на забите.

Паста што содржи флуор

Пастите што содржат флуор се најдобар начин за да се спречи распаѓање на забите, сепак кај децата до 6 години се препорачува да се користи многу мала количина. Она што е важно за забите на децата е четкањето најмалку два пати на ден и по секој оброк или закуски, доколку е можно.

Посета кај стоматолог

Редовната посета кај стоматолог е многу важна за одржување на доброто здравје на забите на детето и за рано откривање на можни проблеми со развојот на забите. Првата посета на стоматолог се препорачува да се направи откако детето ќе наполни 1 година или во рок од 6 месеци од пробивањето на првиот заб.


Споделете со пријателите!