Победете го депресивното расположение во вистински избор на храна
Студените и кратки денови, со недостаток од дневна светлина можат значително да влијаат врз расположението. Најчеста навика е депресивните расположенија да се „лечат“ со консумирање висококалорична брза храна и многу чоколадо. Чоколадите и тортите во својот состав имаат брзи јаглехидрати (со висок степен на гликемиски индекс) и масти, и со тоа претставуваат комбинација која што може да му наштети на здравјето.
Според едно истражување, храната што ја внесуваме може да влијае врз депресијата и депресивното расположение. Фокус на истражувањето била храната со висок гликемиски индекс како ризик фактор за депресија, спроведено на чело со проф. д-р Џејмс И. Генгвич од универзитетот Колумбија. Се докажало дека храната со висок гликемиски индекс се поврзува со поголеми шанси за депресија, но за сигурни заклучоци потребни се дополнителни истражувања. Воедно, се открило што штити од развивање на депресија. Тоа е храната богата со хранливи влакна, производи од цели зрно, овошје и зеленчук. Други студии пак, истакнале видови на храна коишто превенираат депресивно расположение: храна која што содржи Б витамин, храната богата со омега 3 масни киселини и маслиновото масло.
Земајќи го сето ова во предвид, за добро расположение и добро здравје, треба да се консумираат производи со ниска вредност на гликемиски индекс, особено во зима, кога деновите се кратки и поголем дел од денот се престојува во затворен простор. Храната со ниска вредност на гликемиски индекс овозможува константно ниво на шеќерот во крвта, поточно ситоста што се чувствува после нивно консумирање.
Јадете јаткасти плодови и семки од тиква
Бадемите, семките од тиква, сончогледот, се познати природни антидепресиви, богати со витамин Е, цинк, манган. Исто така, бадемите имаат многу низок гликемиски индекс (15). Јаткастите плодови се голем извор на енергија, бидејќи се природен извор на магнезиум, кој активира бројни ензими вклучени во создавање на енергијата на телото. Јаткастите плодови изобилуваат со хранливи влакна кои го одржуваат стабилно нивото на шеќер, како и протеини кои што ќе ве заситат. Внесувајте и гоџи бобинки бидејќи содржат витамин Е, кој ретко може да се најде во овошјето.
Интегрален ориз
Храната со полно зрно поседува многу хранливи влакна и заради тоа претставува вид на храна којашто штити од депресивно расположение. Интегралниот ориз, ги содржи витамините Е, како и витамини од групата Б, исто така важни за борбата со депресивното расположение. Важен податок поврзан со интегралниот ориз е дека претставува основен природен извор на витамин B1. Овој витамин ја забрзува функцијата на штитната жлезда и го загрева организмот и е идеална храна за ладните зимски денови. Воедно, овој витамин помага при варењето на храната и ја подобрува психичката стабилност.
Храна богата со омега 3 масни киселини
Омега 3 масни киселини се многу здрави за организмот, штитат од депресија како и од срцеви заболувања. Чиа семето изобилува со омега масни киселини, затоа е корисно како дел од вашето дневно мени. Колку за илустрација, чиа содржи осум пати повеќе омега-3 од лососот, кој е на врвот на храна богата со омега масни киселини. Комбинацијата од лен, сусам, сончоглед и семки од тиква е богат извор на омега 3 масни киселини односно здрави масти, протеини, јагленохидрати, минерали и витамини.
Појадувајте
Не е важно само што туку секако и кога се консумира. За подобрување на расположението, многу е важно да појадувате.
Чиа семето е одличен избор за појадок, доколку сакате појадок со малку јаглехидрати. Измешајте ¼ шолја чиа семе и ¾ млеко, кокосово млеко или бадемово. Оставете го да отстои преку ноќ во фрижидер, или 20 минути доколку немате време. Неколку истражувања покажале дека јадењето овесни снегулки го намалува гладот и ве држи сити до ручекот. Според „Индексот на ситост“, овесот е храна број 1 при избор за појадок и на трето место на рангирање на сите видови на храна.
Освен појадокот, депресивното расположение се третира и со редовна физичка активност и квалитетен сон.
Напомена: Сезонската зимска депресија (за која што станува збор во текстот) да не се поистоветува со клиничка депресија. Сезонската зимска депресија не претставува серозна состојба и не бара лекување со медикаменти.
