Дознајте зошто гоџи бобинките се избор на храна на славните личности како Мадона и Миранда Кер
Гоџи бобинките, познати и како волчји бобинки, се сметаат за „супер храна“ заради големата хранлива вредност што ја поседуваат, а во прв ред, заради големото присуство на антиоксиданси. Тие се извор за долговечност и се едни од најмоќните билки во светот. Во Азија, се нарекуваат „црвени дијаманти“ и освен како храна, се користат и за лекување и превенирање на многу здравствени состојби. Тие се едни од најквалитетните природни додатоци на исхраната, корисни за целиот организам. Ги нарекуваат уште и „среќни бобинки“ бидејќи човек се чувствува добро кога редовно ги консумира, зашто ја зголемуваат енергијата и издржливоста.
Гоџи бобинките го јакнат имунитетот, ја подобруваат циркулацијата, позитивно влијаат на покачен крвен притисок, ги штитат бубрезите и црниот дроб, ги превенираат срцевите заболувања, ја подобруваат сексуалната функција и позитивно влијаат врз плодноста. Сите овие здравствени придобивки се благодарение на својствата што ги поседуваат.
Богати се со антиоксиданси од кои најзначајни се витамините Ц, Е и Б комплекс, цинк, бета каротен, кој придонесува за здрав изглед на кожата и зеаксантин, делотворен за видот. Исто така, овој плод се смета за најголем извор на железо што може да го поседува една билка. Воедно, поседува повеќе витамин Ц од портокалот. Интересен податок е дека гоџи бобинките содржат и витамин Е, кој ретко може да се најде во овошјето. Витаминот Е ги штити клетките од слободните радикали, кои се поврзуваат со појавата на рак. Исто така, овој витамин го забавува стареењето. Изразено во бројки, гоџи бобинките содржат 18 аминокиселини и дури 21 минерал. Есенцијалните масни киселини во нивниот состав, придонесуваат за правилно функционирање на мозокот и нервниот систем.
Како свеж производ имаат краток век, па затоа најчесто може да се најдат сушени. Може да се комбинираат со многу јадења и да се јадат суви или пак малку отстоени во вода. Тие се совршен здрав избор за ужина, во комбинација со јаткасти плодови, семиња и други сушени овошја. Тие се одличен додаток во многу рецепти кои вклучуваат овошно смути, овесни снегулки, чиа пудинг, мусли, житарки и десерти. Како и секоја храна која што го носи популарниот предзнак „супер храна“, треба да се внимава на дневниот внес, кој не треба да преминува 30 грама дневно.
