Новото истражување најде начин како да ја открие биолошката возраст со тоа што ги пронајде гените што се заслужни за неа
Најверојатно знаете дека освен дадената хронолошка возраст што ја имате, онаа запишана во изводот на родени, постои уште една, наречена биолошка возраст. Биолошката возраст е одредена од состојбата на организмот, односно од тоа колку добро функционира Вашето тело. Таа всушност претставува Вашата вистинска возраст. Едно ново истражување пронајде начин како да ја открие со тоа што ги пронајде гените што се заслужни за тоа.
Научниците од „King’s College“ од Лондон, тврдат дека откриле како телото навистина старее, односно што точно го предизвикува процесот и брзината на стареење. Тие откриле дека гените се заслужни за процесот на стареење, како и за долговечноста. Тестовите од истражувањето ја бараа „компонентата за стареење“ во клетките преку процес на споредба на функцијата на 150 гени. Со тие гени научниците го пресметувале таканаречениот „ генетски резултат на здраво стареење“.
За да ги потврдат резултатите дали навистина се во согласност со здравјето на луѓето, своите методи ги тестирале врз две групи на учесници од 70 годишна возраст. Се открило дека повисокото ниво на овој генетски резултат навистина е поврзано со подобро здравје, вклучувајќи подобро когнитивно здравје. Дијагностицираните со Алцхајмерова болест, покажале ниско ниво на генетски резултат. Тоа значи дека тестот успеа да детерминира кои генетски разлики ги одредуваат и одделуваат овие две групи на учесници.
„Ова истражување овозможува силен доказ дека деменцијата кај луѓето може да се нарече како вид на „забрзано стареење“ или „неможност за активирање на процесот за здраво стареење“, вели научникот Џејмс Тимонс – James Timmons.
Научниците во иднина, се надеваат дека некогаш склоноста кон болестите кои доаѓаат со староста, ќе можат да се дијагностицираат со едноставно земање на крв.
Можеби ова истражување не наоѓа начин како да се запре процесот на стареeње, но во иднина може да придонесе за бројни подобрувања во полето на медицината. Тоа особено се однесува на болестите поврзани со процесот на стареење, како деменција, остеопороза и Ајцхајмеровата болест. Научниците се надеваат, дека доколку се рано идентификуваат конкретните гени, би можело навремено да се дијагностицира болеста.
