Фитнес навики коишто треба да ги усвоите доколку сакате да имате подобро здравје
Доколку се занимавате рекреативно, одењето во сала за вежбање најчесто претставува комплициран процес. Тука секогаш се и многуте изговори зошто не вежбате редовно – немате време, немате пари, немате превоз, не се чувствувате добро и сл. Не треба да се вежба само доколку сте решиле да слабеете, туку потребна е континуирана физичка активност со цел да се одржи кондицијата за да не се појавуваат ненадејни болки во грбот, вратот, половината, како последица од долгите часови поминати пред компјутер и неправилното држење на телото. Доколку редовно практикувате физичка активност, таа нема да ви биде еднократен проект туку начин на живот, односно дел од секојдневните навики.
Постојано активни
Активноста е една од најважните животни навики за здраво тело и долговечност. Не треба да имате строги фитнес режими, но постојаното движење ќе ви ја подобри кондицијата и ќе ви помогне да останете фит понатаму во староста. Одете пеш наместо со лифт, пешачете до работа или возете велосипед, секоја пауза искористете ја да станете и да се прошетате, викендите не ги поминувајте дома и практикувајте активен одмор: пешачење, планинарење и сл.
Подобрете ја флексибилноста и рамнотежата
Не го избегнувајте тренингот за сила, без оглед на вашите фитнес цели. Тренингот за сила и издржливост е одличен за здравјето, особено подоцна во животот. Ефективен е за поздрав мозок, поздрави коски, повеќе енергија и уште многу други придобивки. Ова подеднакво важи и за жените, коишто не треба да се плашат дека од ваквиот вид на вежби ќе направат големи мускули.
Континуираност
Не се откажувајте при првото воспаление на мускули. Не форсирајте и вежбајте со план. Резултатите доаѓаат со континуираност и посветеност. Најчесто моментот на откажување доаѓа кога вежбањето се сфаќа како тешкотија, обврска која што треба да се реализира. Најдете фитнес програма или вид на вежби во коишто уживате, на тој начин нема да го доживувате вежбањето како обврска. Денес има навистина многу избор, па тешко дека може да смислите изговор дека ништо не ви одговара.
Време за опуштање
Колку што е важно вежбањето, толку е важен и одморот. Не треба ни да се претера со вежбање, на мускулите им треба и одмор. Опуштете се со активности во коишто уживате, медитирајте, имајте редовен и квалитетен сон. На овој начин полесно ќе се изборите со секојдневниот стрес.
Внимавајте на храната и на внесот на течности
Се знае дека мускулите, витката линија и здравјето, започнуваат од кујната. Голем дел од здравите навики е и изборот на храна. Тоа не значи дека треба да се окупирате околу секој оброк, туку обидете се да ја пронајдете вашата лична рамнотежа. Меѓу трендовите за храна за 2017 година, се буда чиниите, коишто претставуваат здрав оброк а се лесни за подготовка. Избегнувајте диети и внесувајте повеќе сезонска и свежа храна. Добар систем на исхрана кој што го практикуваат некои познати личности за ја да одржат витата линија е начинот на исхрана, наречен 80/20. Внесот на вода е исто така многу важен. Не е потребно да испиете неколку литри вода, едноставно не дозволувајте да дехидрирате, бидејќи дехидрацијата ќе ја забави работата на метаболизмот.
Здравјето на прво место
Слабеење или кондиција, без оглед што сакате да постигнете или одржите, здравјето секогаш треба да ви биде на прво место. Тоа значи дека треба постојано да се грижите за имунитетот. Вежбањето, храната и сонот, ја подобруваат отпорноста на организмот кон многу болести. И го контролираат стресот. Единствен совет кој треба да го послушате, е да се фокусирате на здравите навики отколку на резултатите. Наградата од вашите заложби е здравјето.
