Научна студија откри дека депресијата што започнува пред или за време на бременоста честопати трае подолго, затоа што е поверојатно да остане незабележана
Повеќето од жените очекуваат дека бременоста ќе им даде чувство на исполнетост и среќа и сметаат дека кога ќе бидат бремени во нив ќе се разбуди некоја магична радост на мајчинството. Н, за многумина, особено за оние со преголеми очекувања, визијата за среќно мајчинство се претвора во тажно депресивно искуство. Иако свесноста за душевните нарушувања што се јавуваат после породувањето се зголеми во изминативе неколку години и лекарите обично ги прегледуваат новите мајки за да проверат дали имаат симптоми на постпородилна депресија, додека видовите на депресија кои се појавуваат во другите периоди на бременоста, како пренаталната депресија, се помалку проучувани.
Депресијата е сериозна болест која треба да се лекува.
Новата студија од Универзитетот „Нортвестерн“ е една од првите, како што велат авторите, која ги истражува депресиите поврзани со мајчинството и тоа во три фази: пред бременоста, пренаталната и постпородилната. Ова истражување уште повеќе ја подигнува свеста за бременоста. Разбирањето и предвидувањето на тоа како жените се чувствуваат во различните периоди од бременоста е клучот.
„Депресијата е сериозна болест која треба да се лекува“ – истакна авторот на студијата Шиан Фишер – Sheehan Fisher, инструктор по психијатрија и науки за однесувањето од медицинскиот факултет „Фајнберг“ од Универзитетот „Нортвестерн“. Тој заедно со своите коавтори, откри дека повеќе од една третина од жените се депресивни додека се трудни.
Податоците од студијата покажаа дека 37% од испитаничките биле во депресија за време на деветте месеци од бременоста, 25% пред бременоста и 38% откако веќе се породиле.
Психијатрите сметаат дека започнувајќи од неплодноста, па сè до појава на болест или доживување на големи животни промени, па продолжувајќи со набљудување на среќни трудници во нивната околина, додека тие не се чувствуваат среќни – сето тоа може да доведе до депресија, се истакнува во извештајот.
Истражувањата покажуваат дека кај многу од трудниците кои поминуваат низ овие мрачни емоционални фази, во периоди кои всушност треба за нив да претставуваат убави моменти, ова резултира со одложување на второто (следното) дете. Научниците исто така откриваат дека иако досега на пост породилната депресија ѝ се обрнуваше најголемо внимание, се увиде дека е најлесната форма.
Во студијата биле испитувани 727 трудници од Питсбург за време на четвртата до шестата недела после породувањето. Тие биле прашани кога започнала нивната депресија: за време на бременоста или по бременоста? Оние чии депресивни симптоми започнале порано, имале хронична депресија со поистакнати симптоми, како потешкотии со заспивањето или параноја.
„Менталните заболувања пред, за време и после бременоста не се „хомогени болести“. Факторите како возраст, образование, брачен статус, здравствено осигурување – исто така влијаат врз анксиозноста и депресијата. Откривањето на моментот кога жената започнува психички да се мачи е од големо значење за третманот“ – вели д-р Фишер. Тој додава дека некои случаи со трудничка депресија започнати во третата недела од бременоста, а за кои лекарот не знаел, може да траат и цела година, а тежината на депресијата може да се менува со текот на времето.
