Направете си сами домашна гранола
Ова е прекрасен и лесен рецепт за крцкаво мусли. Добро е да се има што поголем избор на здрава храна, која што, за среќа, е сè позастапена во нашите продавници, но некогаш е повкусно и поевтино да си направите сами дома. Таков е случајот и со ова крцкаво мусли – гранола. Гранолата што сами ќе ја направите, ќе ви трае месец – два, доколку ја ставите во чиста тегла на собна температура, но толку е вкусна што најверојатно ќе ја изедете пред тоа.
Совет: употребете чаша од 250 мл. за мерење на состојките
- 2 чаши овесни снегулки;
- 1 чаша непечени бадеми, грубо исецкани (или лешници, ореви);
- 1/2 чаша кокос;
- 2 лажици мед;
- 2 лажици масло (но не маслиново масло);
- 6 лажици сок од јаболко;
- половина пакетче ванилин шеќер;
- суво грозје или сува брусница по желба;
- 1 лажица семки од тиква;
- 1 лажица семки од сончоглед;
- 1 лажица ленено семе.
Во длабок сад, измешајте ги сите суви состојки. Теглата мед, ставете ја во сад со жешка вода за медот да стане потечен (ова ќе ви помогне да ја измешате смесата полесно, а медот ќе се врати во нормална состојба кога ќе се олади). Додајте ги останатите состојки и измешајте убаво. Смесата ќе биде влажна, но не течна. Загрејте ја рерната на 150ºС степени. Со хартиена салфета намачкајте малку масло во метално тавче и во него истурете ја смесата. Слојот треба да биде околу сантиметар и пол или два, бидејќи доколку е подебел од 2 см., гранолата нема да биде крцкава, а може и да изгори. Печете ја гранолата околу 25 минути, и додека се пече, неколку пати измешајте со лажица. Гранолата е готова кога ќе зарумени. Бадемите лесно горат па бидете внимателни да не ја препечете. Извадете ја од рерна и истурете ја на голем послужавник за целосно да се олади пред да ја ставите во тегла или кутија. Јадете ја со овошен јогурт, со кисело млеко и јогурт, илл додајте ја на варени овесни снегулки за малку крцкавост и уживајте!
* рецептите со во целост превземени од ситно сецкано
