Денес е Светски ден за борба против ракот на панкреас

На 17 ноември светот ја покренува свеста за еден од најсмртоносните видови на рак – рак на панкреас 

Кога на некого ќе му дијагностицираат рак на панкреас, семејството и пријателите стануваат главната поддршка. Токму затоа, овогодинешното мото на Светскиот ден за борба против ракот на панкреас гласи „Во ова сме заедно“ – In it together, со цел да се приклучат што повеќе луѓе на глобално ниво во знак на поддршка за борба на оваа „тивка“ болест. Целта е светот да слуша, да научи и да покаже дека сите се заедно во борбата против овој вид на рак.

Статистиката покажува дека само 2 до 10 проценти од дијагностицираните со овој вид на рак живеат 5 години. Ракот на панкреас претставува 4-та водечка причина за смртност од рак кај мажите и жените во развиените земји. Се предвидува дека со 2020 година, ќе има 418 илјади нови случаи на дијагностицирани лица на светско ниво.

Клучот е во раната дијагноза, бидејќи доколку рано се открие, шансите за продолжување на животниот век се поголеми. Во 75 проценти од случаите ракот на панкреас се открива со компјутерска томографија.

Ракот на панкреас се нарекува „тивка“ болест бидејќи ретко се открива во раните фази, што го прави еден од најсмртоносните видови на рак. Започнува во ткивото на панкреасот а симптомите не се појавуваат сè додека болеста не е напредната. Кога знаците и симптомите се појавуваат, тие може да вклучуваат:

• болки во горниот дел на стомакот, кои може да се манифестираат и како болки во грбот кои преминуваат накај лопатките;
• слаб апетит/губење на апетитот;
• слабеење;
• жолтица;
• депресија;
• дијабетес;
• згрутчување на крвта.

Главни ризик фактори се возраст, пушење, исхрана богата со заситени масти и црвено месо а сиромашна со овошје и зеленчук, дебелина (лицата чиј индекс на телесна маса е над 30, имаат поголеми шанси да заболат од рак на панкреас), недостаток на физичка активност или присуство на други болести како дијабетес или цироза на црниот дроб. На најголем ризик се изложени оние со семејна историја на рак на панкреас, карцином на дојка и јајници, полипоза на дебело црево, наследен панкреатит и меланом.

За борба против овој вид на рак, најважна е превенцијата. Превенцијата најмногу се однесува на промена на животниот стил со внесување на здрави навики како откажување од пушење, одржување на телесната тежина, редовно вежбање и физичка активност и здрава исхрана базирана на свежо и сезонско овошје и зеленчук.